İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 638 Hüküm no: 491 Orijinal metin no: [165b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayun için yirmi yedi çeşit ordu esnafının Davutpaşa sahrasında hazır edilmesi Yevm-i selâse fî 18 min-Cemâziyelâhire li-sene 1107. A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn hallâlü’l-müşkilâti’d-dîniye keşşâfü’l-mufassalâti’l-yakīniye miftâhu rumûzi’d-dekāyık messâhu künûzi’l-hakāyık el-muhtassu bi-mezîd-i inâyeti’l-meliki’l-mu‘în Anadolu kādıaskerliği pâyesiyle İstanbul kadısı Mevlânâ ( ) -edâmallâhu te‘âlâ fezâilehû- tevkī‘-i refî‘-i hümâyûn vâsıl olucak ma‘lûm ola ki, sinîn-i sâbıkada sefer-i hümâyûnum vâki‘ oldukça ordu esnafı ihrâcı mu‘tâd-ı kadîm olup işbu bin yüz yedi senesinde musammem olan sefer-i hümâyûnum için dahi vakti hulûlünde nevrûz-ı sultânîden on gün mukaddem Davutpaşa sahrâsında mevcûd etdirilmek üzere mevkūfâtdan verilen mühürlü ve nişânlı sûret-i defterde ta‘yîn olunduğu üzere şehr-i İstanbul’da yirmi yedi hırfet seksen dört çadır olmak üzere bütün esnaf ordusu ihrâcı fermânım olmağla ma‘rifet-i şer‘le ihrâc ve nevrûz-ı sultânîden on gün mukaddem Davutpaşa sahrâsında mevcûd ve hazır ve âmâde etdirdesiz deyü fermânım olmuşdur. Buyurdum ki, hükm-i şerîfimle ( ) vardıkda bu bâbda sâdır olan emrim üzere amel edip dahi kat‘an te’hîr ü tevakkuf etdirmeyip sefer-i hümâyûnum için mu‘tâd-ı kadîm üzere bütün ordu esnafı olmak üzere şehr-i İstanbul’dan yirmi yedi hırfet seksen dört çadır olmak şartıyla irsâl olunan mühür ve nişânlı mevkūfât defterine tasrîh olunduğu üzere ihrâcı ve nevrûz-ı sultânîden on gün mukaddem Davutpaşa sahrâsında hazır ve mevcûd etdirdip sâir seneler kıyâsıyla avk ü te’hîr etdirmeyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’s-sâmin aşer min-Cemâziyelâhir li-sene seb‘a ve mie ve elf. Be-makām-ı Kostantıniyye el-mahrûse Veredehû fî 18 min-Cemâziyelâhire sene 1107. Defter-i ihrâc-kerden-i orducuyân an hâliyâ mahrûse-i İstanbul berây-ı sefer-i hümâyûn el-vâki‘ 4 li-sene 1107. Telhîs-i defter-i Hazîne-i âmire Hırfet-i . hallâcân. hayme 2 Hırfet-i. şemşîrgerân?. hayme 2 Hırfet-i. kemâ[n]gerân. hayme 2 Hırfet-i. semerciyân. hayme 3 Hırfet-i. arpacıyân. hayme 4 Hırfet-i. sarrâcân. hayme 4 Hırfet-i. bezzâzân. hayme 4 Hırfet-i. eşkinciyân. hayme 5 Hırfet-i. berberân. hayme 6 Hırfet-i. na‘lbandân. hayme 4 Hırfet-i. mumcuyân. hayme 2 Hırfet-i. başcıyân. hayme 2 Hırfet-i. na‘lçacıyân. hayme 4 Hırfet-i. attarân. hayme 4 Hırfet-i. bakkālân. hayme 4 Hırfet-i. mûytâbân. hayme 4 Hırfet-i. aşcıyân. hayme 2 Hırfet-i. hayyâtân. hayme 4 Hırfet-i. cennânân. hayme 8 Hırfet-i. çukacıyân. hayme 2 Hırfet-i gazzazân. hayme 2 Hırfet-i çakşurcıyân. hayme 3 Hırfet-i. kaftânân. hayme 2 Hırfet-i. çadırcıyân. hayme 1 Hırfet-i . bakırcıyân. hayme 1 Hırfet-i. kalaycıyân. hayme 1 Hırfet-i. habbâzân. hayme 4 Yekûn-ı hırfet-i hümâyûn 27. hayme 84 Tahrîren fî 10 C sene 1107 Kad vasale ileynâ fî 18 Cemâziyelâhire sene 1107.