İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 640 Hüküm no: 493 Orijinal metin no: [167a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da ellerinde muafiyet beratları olmadığı müddetçe Kıbti cizyeleri ve Müslüman maktularının tahsil edilmesi Akzâ kuzâtü’l-Müslimîn evlâ vülâti’l-muvahhidîn ma‘denü’l-fazli ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâ ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, bin yüz altı senesine mahsûb olmak üzere İstanbul Kıbtiyân cizyesi cibâyeti ve Müslümânânın maktû‘ları tahsîline me’mûr olan Ahmed -zîde mecduhû- Dîvân-ı hümâyûnuma arzuhâl sunup eline verilen berat-ı şerîfim mûcebince Kıbtiyân tâifesinin evrâk ile cizyesi ve maktû‘ları tahsîline mübâşeret eylediğinde Kıbtiyân tâifesinin ba‘zıları mücerred cizyelerin ve maktû‘ların vermemek için biz cebehâne ve tersâneye ve hâs bahçeye hizmet ederiz, cizyeden mu‘âfız deyü vermekde ta‘allül edip mîrîye gadr eylediklerin bildirip ol makūlelerin zâbitleri ma‘rifetiyle cizye ve maktû‘ları tahsîl olunup ta‘allül ve nizâ‘ etdirilmemek bâbında emr-i şerîfim recâ eyledikleri ecilden Hazîne-i âmiremde mahfûz olan ma‘den mukāta‘ası defterlerine nazar olundukda bin yüz altı senesine mahsûb olmak üzere İstanbul kalemi Kıbtiyân cizyesi cibâyeti ve Müslümânân nâmında olanların maktû‘ları mîrî evrâk ile cem‘ ü tahsîl olunmak üzere İstanbul cizyedârı Karakulak Ahmed’in -zîde mecduhû- uhdesinde olup tâife-i mezbûrînin Müslümân nâmında olanlarında altışar yüz altmış akçe maktû‘ları ve keferesinin yedişer yüz otuzar akçe cizyeleri serbestiyyet üzere cem‘ ü tahsîl olunmak üzere defterde mastûr olup derûn-ı arzuhâlde olan ol makūle hizmetleri mukābelesinde cizye ve maktû‘larından mu‘âf olan Kıbtiyânların lüzûmu olduğu tekrar arz ü i‘lâm olunup müceddeden fermân olunmadıkça kadîmde olan mu‘âfiyetlerine amel olunmak üzere fermân vârid olduğu mastûr ve mukayyed bulunmağın imdi derkenârı mûcebince amel olunmak fermânım olmuşdur. Buyurdum ki, hükm-i şerîfim vardıkda bu bâbda sâdır olan emrim üzere amel edip dahi tâife-i mezbûrenin mu‘âfiyet iddi‘â edenlerinin yedlerinde cedîd fermânları olmayanların üzerlerine edâsı lâzım gelen cizye ve maktû‘ları cizyedârın yedinde olan berat-ı âlîşân mûcebince evrâk ile tahsîl etdirdip hilâf-ı kānûn ve defter kimesneye ta‘allül ve nizâ‘ etdirmeyesin şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ ve’l-ışrîn min-Cemâziyelâhire li-sene seb‘a ve mie ve elf. Veredehû fî 25 Cemâziyelâhire li-sene 1107. Be-makām-ı Kostantıniyye el-mahrûse