İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 643 Hüküm no: 498 Orijinal metin no: [167a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Sultan’a ait Ayvansaraykapısı haricinde bulunan fırında ekmek pişirilmesine kimsenin mani olmaması Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u’l-i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, seyyidetü’l-muhadderât iklîletü’l-muhassenât tâcü’l-mestûrât hemşîrem Hadîce Sultan’ın -dâmet ismetuhâ- kethudâlığı hizmetinde olan kıdvetü’l-emâsil ve’l-a‘yân ( ) -zîde mecduhû- südde-i sa‘âdetime arzuhâl sunup müşârün-ileyhânın mahmiye-i İstanbul’da Ayvansaraykapısı hâricinde mutasarrıfa olduğu hâs ekmek fırınıda selâse-i erbâ‘ı vezni üzere hâs ekmek tabh olunmak bâbında hükm-i hümâyûnum recâ etmeğin fırın-ı mezbûrda kadîmîsi üzere selâse-i erbâ‘ı vezni üzere hâs ekmek tabhına müdâhale ve mümâna‘at olunmamak bâbında hatt-ı hümâyûn-ı şevket-makrûnumla fermân-ı âlîşânım sâdır olmuşdur. Buyurdum ki, ( ) vusûl buldukda bu bâbda hatt-ı hümâyûn-ı şevket-makrûnumla sâdır olan fermân-ı celîlü’l-kadrim mûcebince amel edip dahi fırın-ı mezbûra kadîmîsi üzere selâse-i erbâ‘ı vezni üzere hâs ekmek tabhına kimesneyi müdâhale ve mümâna‘at etdirmeyip emr-i şerîfimin mazmûn-ı münîfi ile âmil olasın şöyle bilesin, alâmet-i şerîfe i‘timâd kılasın. Tahrîren fî evâsıtı şehri Receb li-sene seb‘a ve mie ve elf. Vesale ileynâ fî 126 Receb. Be-makām-ı Kostantıniyye el-mahrûse