İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 643 Hüküm no: 499 Orijinal metin no: [167a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma için gerekli olan doksan beş nefer kürekçinin temin edilerek tersaneye teslim edilmesi Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn vârisü ulûmü’l-enbiyâi ve’l-mürselîn râfî‘u i‘lâmi’ş-şerî‘ati ve’d-dîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı - zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ evvel-bahâr-ı huceste-âsârda deryâ yüzüne çıkacak Donanma-yı hümâyûnum kadırgalari’çün her sene aynî kürekçi ihrâcı mu‘tâd-ı kadîm olup İstanbul etrâfı iskelelerinin kayıkçıyân ve peremeciyân ve mavnacıyân esnafının bir nefer kethudâlık ile doksan beş nefer aynî kürekçileri bin yüz yedi senesine mahsûb olmak üzere ihrâc ve teslîm-i tersâne etdirilmek fermânım olmuşdur. Buyurdum ki, hükm-i şerîfimle ( ) vardıkda bu bâbda sâdır olan emrim üzere amel edip dahi târih-i mezbûra mahsûb olmak üzere zikrolunan peremeciyân esnafı tavâyifinin ihrâcı lâzım gelen doksan beş nefer aynî kürekçileri mu‘accelen ihrâc ve nevrûzdan ( ) gün mukaddem teslîm-i tersâne-i âmirem etdirmekde mücidd ve sâ‘î olasın ve ihrâc olunan kürekçilerin yarar yerli kefîllerini alıp güçlü ve kuvvetli küreğe yarar tuvânâ kürekçiler olup alîl ve sabî ve mecnûn olmakdan ve bilâ-kefîl âdem yazmakdan ihtirâz eyleyesin ve zikrolunan aynî kürekçi neferâtı ihrâc ve teslîm-i Tersâne-i âmirem olundukda Tersâne-i âmirem emîninden -zîde mecduhû- memhûr temessük alıp itmâm-ı hizmet eyleyesin, şöyle ki zikrolunan kürekçiler aynî kürekçi ihrâc olunup akçe alınır mülâhazasıyla bir nefer kusûr komakdan ve vakt-i zamanıyla teslîm olunmamağla Donanma-yı hümâyûnum te’hîrine bâ‘is olmakdan be-gāyet ihtirâz eyleyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ min-Şevvali’l-mükerrem li-sene sitte ve mie ve elf. Veredehû fî 19 min-Receb sene 1107. Be-makām-ı Edirne el-mahrûse.