İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 647 Hüküm no: 503 Orijinal metin no: [168b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cenabî Bey Medresesi’nin vakıfları zamanla kaybolduğundan, İstanbul ihtisabından müderrisler için pay ayrıldığı Cenâbî Bey Medresesi bir buk‘a-i kadîme olup mürûr-ı ezmine ile evkāfı zâyi‘ olmağın medrese-i mezbûre müderrisleri mutasarrıf olmak üzere İstanbul ihtisâbı mukāta‘ası malından beher sene tamamıyla ve para üçer akçeye olmak üzere yevmî kırk akçe vazîfe tevcîh ve berat-ı âlîşânım verilmek fermân olmağın bin yüz yedi senesi Şa‘bâni’l-mu‘azzamının gurresi günü târihiyle müverrah verilen ruûs-ı hümâyûnum mûcebince mukāta‘a-i mezbûre malından beher sene tamamıyla bir para üçer akçeye ve medrese-i mezbûre müderrisleri mutasarrıf olmak üzere tevcîh edip ve bu berat-ı hümâyûn-ı sa‘âdet-makrûnu verdim ve buyurdum ki, medrese-i mezbûre müderrisîni olanlar varıp vech-i meşrûh üzere ta‘yîn olunan yevmî kırk akçe vazîfesin İstanbul ihtisâbı mukāta‘ası malından emîn olanlar yedinden beher sene tamamıyla ve para üçer akçe olmak üzere alıp mutasarrıf olalar, ol bâbda hiç ferd dahl ü ta‘arruz kılmayalar, şöyle bileler, alâmet-i şerîfe i‘timâd [kılalar]. Tahrîren fi’l-yevmi’s-sâmin min-Şa‘bâni’l-mu‘azzam li-sene seb‘a ve mie ve elf. Be-makām-ı Kostantıniyye.