İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 646 Hüküm no: 502 Orijinal metin no: [168a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sakız’a gönderilmek üzere gemilere yüklenmiş olan buğdayın nakline engel olunmaması Kıdvetü’l-kuzât ve’l-hükkâm ma‘denü’l-fazl ve’l-kelâm Boğaz hisarları kadıları -zîde fazluhâ- ve kıdvetü’s-sikāt ve’l-müstahfızîn Boğaz hisarları dizdârları -zîde hıfzuhumâ- tevkī‘-i refî‘-i hümâyûn vâsıl olucak ma‘lûm ola ki, emirü’l-ümerâi’l-kirâm Sakız muhâfazasında olan Mahmud -dâme ikbâluhû- südde-i sa‘âdetime arzuhâl gönderip mîrimîrân-ı mûmâ-ileyhin zahîreye ziyâde muzâyakası olmağla mahmiye-i İstanbul’da Unkapanı’nda akçesiyle iştirâ ve sefîneye tahmîl ve Sakız’a nakl murâd eylediği yalnız altı yüz keyl hıntanın Boğaz hisarlarına mürûruna mümâna‘at olunmamak bâbında hükm-i hümâyûnum recâ eylediği ecilden ancak bir def‘a yalnız altı yüz keyl hıntanın nakline mümâna‘at olunmamak emrim olmuşdur buyurdum ki, ( ) vusûl buldukda bu bâbda sâdır olan fermân-ı celîlü’l-kadrim mûcebince amel edip dahi mîrimîrân-ı mûmâ-ileyhin ancak bir def‘a akçesiyle iştirâ eylediği yalnız altı yüz keyl hıntanın Sakız’a nakline mümâna‘at olunmayıp emr-i şerîfimin mazmûn-ı münîfi ile âmil olasın şöyle bilesin, alâmet-i şerîfe i‘timâd kılasın. Tahrîren fî evâhiri şehri Receb li-sene seb‘a ve mie ve elf. Be-makām-ı Kostantıniyye el-mahrûse.