İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 649 Hüküm no: 509 Orijinal metin no: [169b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyhan Sultan’ın has ekmek fırınına yapılan müdahelenin engellenmesi Hatt-ı hümâyûn sûreti Emr-i şerîfim mûcebince amel oluna Akzâ kuzâtü’l-Müslimîn evlâ vülâti’l-muvahhidîn ma‘denü’l-fezâil ve’l-yakīn râfi‘u’l-ulûmü’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, seyyidetü’l-muhadderât iklîletü’l-muhassenât tâcü’l-mestûrât Beyhan Sultân’ın -dâmet iffetuhâ- bi’l-fi‘il kethudâlığı hizmetinde olan kıdvetü’l-emâcid ve’l-a‘yân -zîde mecduhû- südde-i sa‘âdetime arzuhâl edip mahrûse-i İstanbul’da vâki‘ müşârün-ileyhânın mutasarrıf olduğu saray mülhakātından olan hâs ekmek fırını cümleden kadîm olup bu âna değin hâs ekmek tabh olunur iken men‘ olunmağla kadîmden tabh olunduğu üzere harcı ekmeğin selâse-i erbâ‘ı veznince hâs ekmek tabh etdirilmesine muhâlefet olunmamak üzere amm-i büzürgvârım merhûm ve mağfûrun-leh Sultân Ahmed Han -tâbe serâhu- zamanında hatt-ı hümâyûn-ı şevket-makrûnlarıyla mu‘anven emr-i şerîf verildiğin bildirip müceddeden hükm-i hümâyûnum recâ etmeğin vech-i meşrûh üzere amel olunmak emrim olmuşdur buyurdum ki, ( ) vusûl buldukda bu bâbda sâdır olan emrim üzere amel ve harcı ekmeğin selâse-i erbâ‘ı veznince hâs ekmek tabh edip bey‘ etmesine kimse mâni‘ olmayıp mukaddemâ ve hâlâ sâdır olan evâmir-i şerîfenin mazmûn-ı münîfi ile amel olunsun, şöyle bilesin, alâmet-i şerîfe i‘timâd kılasın. Tahrîren fî evâsıtı şehri Receb li-sene seb‘a ve mie ve elf. Be-makām-ı Kostantıniyye el-mahrûse.