İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 650 Hüküm no: 510 Orijinal metin no: [169b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçekapı’da Valide Sultan’a ait fırında has ekmek pişirilmesine mani olunmaması ve fazladan vergi taleb edilmemesi Sûret-i hatt-ı hümâyûn Emr-i şerîfim mûcebince amel oluna Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, mahmiye-i İstanbul’da vâki‘ Bahçekapısı kurbünde merhûm ve mağfûrun-lehâ büyük vâlidem sultanın -tâbe serâhâ- müceddeden binâyı ihyâ eylediği câmi‘-i şerîf kurbünde binâ olunan fırında hâs ekmek işlenip ve mahmiye-i mezbûrede olan harcı fırınlarda işlenen harcı ekmeğin sülüsânı hâs ekmek işlemek kānûn-ı kadîm olup vech-i meşrûh üzere işlenegelmeğin müşârün-ileyhânın fırınında dahi işlenen ekmek sülüsân üzere hâs ekmek olup ale’l-istimrâr sülüs-i sülüsânı hesâbı üzere hâs ekmek işlenip ve ümmet-i Muhammed’e dahi enfa‘ olmağla müşârün-ileyhânın fırınına muhtesib ağaları ve kul oğlanları ve âhardan ferd resm ve aylık nâmıyla ve âhar tarîkle dahl ve tecâvüz olunmayıp kadıları tarafından dahi işlenmesine mâni‘ olunmamak üzere merhûm-ı mağfiret-senâ vâlid-i mâcidim Sultan Mehmed Han -tâbe serâhu- zamanında hatt-ı hümâyûn-ı sa‘âdet-makrûnlarıyla mu‘anven emr-i şerîf verilmeğin vech-i meşrûh üzere amel olunmak bâbında fermân-ı âlîşânım sâdır olmuşdur ( ) buyurdum ki, vusûl buldukda bu bâbda mukaddemâ ve hâlâ sâdır olan fermân-ı celîlü’l-kadrim mûcebince amel edip dahi müşârün-ileyhânın mücedded binâ olunan fırında sülüs-i sülüsân hesâbı üzere hâs ekmek işlenip min-ba‘d muhtesib ağaları ve kul oğlanları ve âhardan bir ferdi resm ve aylık namıyla ve bir tarîkle dahl ve tecâvüz etdirmeyip zikrolunan fırında minvâl-i meşrûh ale’l-istimrâr hâs ekmek işlenip İstanbul kadıları tarafından ve âhardan bir ferd işlenmesine mümâna‘at ve müdâhale eylemeyip mazmûn-ı emr-i şerîfimle âmil olasın, şöyle bilesin, alâmet-i şerîfe i‘timâd kılasın. Tahrîren fî evâsıtı Şa‘bân li-sene seb‘a ve mie ve elf. Be-makām-ı Kostantıniyye el-mahmiye.