İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 658 Hüküm no: 520 Orijinal metin no: [172b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayun için görevli olan herkesin evlerinden iş yerlerinden çıkarak bir an önce vazife başına gitmeleri İstanbul kadısı fazîletlü ve izzetlü efendi hazretleri gedikli zu‘amâ ve erbâb-ı tımar ve Dîvân-ı hümâyûn kâtibleri ve ulûfelü şâkirdleri ve sipâh ve yeniçeri ve topçu ve cebeci ve müteferrika ve çavuş ve sâir sefer-i hümâyûna memûr olandan bir ferd evlerinde kalmayıp ordu-yı hümâyûna çıkıp dâirelerinde bulunmak üzere müekked fermân-ı âlî vârid olmağın imdi imtisâlen lehû bi’l-cümle mahallât imâmların çağırıp herkes mahallesinde vâki‘ evlerin ve dükkân ve hân ve icâreli odaların yoklayıp ol makūle sefer-i hümâyûna memûr olan erbâb-ı seferden bir ferd komayıp yarınki gün cümlesini ordu-yı hümâyûna ihrâc ve itâ‘at-i fermân etmeyenleri gelip i‘lâm etmek üzere muhkem tenbîh eyleyesiz, yarından sonra cümle mahallât ve hâne ve dekâkîn yoklanıp ol makūle erbâb-ı seferden bir ferd bulunmak ihtimâli olursa bir vechile özürleri mesmû‘a olmayıp ber-mûceb-i fermân-ı âlî cezâları tertîb ve imâmlardan tekâsül etmeleriyle eşedd-i itâb ile mu‘âteb olunmaları mukarrerdir, ona göre cümlesin âgâh eyleyesin deyü buyruldu. 7 N sene 1107.