İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 661 Hüküm no: 523 Orijinal metin no: [173b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçekapı’daki salhaneye merhum veziriazam Ali Paşazâde İbrahim’in oğullarının tasarruf etmesi için mülknâme verilmesi Düstûr-ı mükerrem müşîr-i müfahham nizâmü’l-âlem umûri’l-cumhûr bi’l-fikri’s-sâkıb mümehhidü mehâmmü’l-enâm bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde sadâret-i uzmâ ve vekâlet-i kübrâ kāimmakāmı olan vezîrim ( ) paşa -edâmallâhu te‘âlâ iclâlehû- ve a‘lemü’l-ulemâi’l-mütebahhirîn ve efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü müşkilât-ı dîniye hallâlü mufassalâti’l-yakīniye miftâhu künûzi’d-dekāyık el-muhtas bi-mezîd-i inâyeti’l-meliki’l-a‘lâ bi’l-fi‘il Anadolu kādıaskerliği pâyesiyle İstanbul kadısı olan Mevlânâ ( ) efendi -edâmallâhu te‘âlâ fezailehû- tevkī‘-i refî‘-i hümâyûn vâsıl olucak ma‘lûm ola ki, vezîriazam-ı sâbık merhûm Ali Paşazâde İbrahim -zîde mecduhû- Ordu-yı hümâyûnuma arzuhâl sunup Bahçekapı kurbünde vâki‘ salhânesi kendülere in‘âm olunmak bâbında inâyet recâ eylemekle zikrolunan salhâne müteveffâ-yı merkūmun dört nefer evlâlarının hâllerine merhameten in‘âm olunmak telhîs olunup arz olundukda mûcebince zabtı için mülknâme-i hümâyûn verilmek bâbında fermân-ı âlîşânım sâdır olmağın mûcebince amel olunmak bâbında fermân-ı âlîşânım sâdır olmuşdur. Buyurdum ki, hükm-i şerîfimle ( ) vardıkda bu bâbda sâdır olan emrim üzere amel edip dahi müteveffâ-yı merkūmun Bahçekapı kurbünde vâki‘ salhânesi dört nefer evlâdlarına hallerine merhameten in‘âm olunmağla kemâ-kân taraflarından zabtedip taraf-ı mîrîden ve âhardan kimesne[yi] müdâhale etdirmeyesiz, alâmet-i şerîfe i‘timâd kılasız. Tahrîren fi’l-yevmi’l-hâmis aşer min-şehri Ramazani’l-mübârek sene [1]107. Mahrûse-i Davutpaşa.