İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 660 Hüküm no: 522 Orijinal metin no: [173a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i hümayun için İstanbul’dan ihracı düşünülen fırınlardan fırın başına beş yüz guruşun nüzul emini tarafından tahsil edilmesi Akzâ kuzâtü’l-Müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u’ i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în mevlânâ İstanbul kadısı -zîdet fezailehû- tevkī‘-i refî‘-i hümâyûn vâsıl olucak ma‘lûm ola ki, inşâallâhu te‘âlâ evvel-bahâr-ı huceste-âsârda sefer-i hümâyûnuma memûr olan kapım kullarının ve sâir asâkir-i mansûrem için ekmek tabh olunmak üzere fırın ihrâcı lâzım ve sefer-i hümâyûnumun umûr-ı mühimmesinden olmağın imdi sinîn-i sâlifede sefer-i hümâyûnum vâki‘ oldukda dergâh-ı mu‘âllâm yeniçerileri ve cebeci ve topçu ocakları ve sâir asâkir-i İslâm ta‘yînâtları için ordu-yı hümâyûnumda ekmek tabh etmeleri için İstanbul ve Bursa ve Edirne ve sâir şehirlerden ekmekçi fırınları ihrâc olunagelip ancak ihrâcına ta‘yîn olunan mübâşir ve ekmekçiler mücerred celb ve ahz için adamların ve bargirlerin ve sâir mühimmât-ı lâzımesini noksan dutup düzenleri tamam ve mükemmel olmadığından yevmiye ekmeklerin tamamıyla işlemediklerinden muzâyakaya bâ‘is olmalarıyla her bir fırın için bin guruş bedellerini dahi tahsîl ve yedlerine meblağ-ı mezbûr ile mühimmât ve ücret-i tabhiyeleri taraf-ı mîrîden verilip müretteb ve mükemmel olmak şartıyla yarar kefîlleri ile iktizâ eylediği mikdârı fırın dutulup hâlâ işbu sene-i mübârekede dahi mühimmât ve tabhiyeleri taraf-ı mîrîden verilmek şartıyla elli kıt‘a fırın dutulmak üzere tahmîn olunmağla sinîn-i sâbıkada fırın ihrâc olunagelen şehirlerden elli kıt‘a fırın tevzî‘ ve ancak bu sene dutulacak elli aded fırın için sene-i sâbıkada tahsîl olunan bin guruşdan beşer yüz guruşları hallerine merhameten tenzîl ve her bir fırın için beşer yüz guruş bedelleri nüzûl emîni -zîde mecduhû- tarafından tahsîl ve tutulacak fırınların mühimmât ve tabhiyeleri için kendüye îrâd kaydolunmak üzere şehr-i İstanbul’dan ihrâcı fermânım olan sekiz aded fırınların her birine fırınlarından beşer yüz guruş bedelleri tahsîl olunmak bâbında arz ve telhîs olundukda [173b] imdi şehr-i İstanbul’dan ihrâcı fermânım olan sekiz aded fırınların hallerine merhameten sinîn-i sâbıkada fermânım olanın nısfı olan beş yüz guruş bedelleri tahsîl olunmak fermânım olmuşdur. Buyurdum ki, hükm-i şerîfimle ( ) vardıkda bu bâbda sâdır olan emrim üzere amel edip dahi şehr-i İstanbul’dan ihrâcı fermânım olan sekiz aded fırınların her bir fırınlarından beş yüz guruş bedelleri nüzûl emîni -zîde mecduhû- tarafından ma‘rifet-i şer‘le cem‘ ve tahsîl etdirip hilâf-ı emr-i şerîf bir ferde inâd ve muhâlefet etdirmeyesiz ammâ bu bâbda ziyâde ihtimâm edip bu bahâne ile ziyâde talebiyle te‘addî ve tecâvüze ve bir gün evvel cem‘ ve tahsîl ve teslîm olunmamağla umûr-ı mühimmenin ta‘tîline bâ‘is olmakdan be-gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sâmin [ve]’l-aşer min-Cumâdelâhir li-sene seb‘a ve mie ve elf. Be-makām-ı Kostantıniyye el-mahmiyye.