İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 700 Hüküm no: 538 Orijinal metin no: [184b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mîrî kalyonlar levendleri için gerekli olan pirinç ve mercimeğin bir kısmı Kahire’den gelmiş olup geri kalanın İstanbul, İzmir ve Kuşadası’ndan temin edilmesi Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devlet ve’l-ikbâl müşeyyidü erkâni’s-sa‘âdetü ve’l-iclâl el-mahfûfu bi-sınûfi avâtıfi’l-meliki’l-a‘lâ vezâretle kapudanım olan vezîrim ( ) paşa -edâmallâhu te‘âlâ iclâlehû- tevkī‘-i refî‘-i hümâyûn vâsıl olucak ma‘lûm ola ki, hâlâ mîrî kalyonlar levendlerinin bin yüz yedi rûz-ı hazarından sene-i mezbûre rûz-ı kasımına gelince çorbalıkları için lâzım gelen on sekiz bin kîle pirinç ve on bir bin iki yüz keyl mercimekleri bundan akdem Mısır irsâliyesi malından havâle olunmuş idi. Zikr olunan pirincin altı bin kîlesi Mısır askerini getiren kalyonlar ile gelip bâkī kalan on iki bin kîle pirincin icâleten tedârüki mühim ve muktezî olmağla düstûr-ı mükerrem müşîr-i müfahham nizâmü’l-âlem mısr-ı Kāhire muhâfızı olan vezîrim el-Hâc İsmail Paşa’nın -edâmallâhu te‘âlâ iclâlehû- kethudâsı yine irsâliye malından mahsûb olmak üzere Âsitâne-i sâ‘adetimde tedârük ve teslîm eylemek şartıyla fermânım olup lâkin bu sene-i mübârekede mısr-ı Kāhire’de mercimek dahi olmamağla zikrolunan on bir bin iki yüz keyl mercimeğin beher kîlesine birer guruşdan on bir bin iki yüz guruş bedeli yine Mısır irsâliyesi malından havâle ve beş bin kîlesinin bedeli birer guruşu mâbeynlerinde tevzî‘ olunmak üzere kapudanlarına teslîm ve altı bin iki yüz guruşun hesâbı taleb olunmak üzere mukābelesinden altı bin iki yüz kîle buğday kethudân Ahmed -zîde mecduhû- ariyyedesinde? olan cizye malından mübâya‘a eylemek üzere bundan akdem havâle ve fermânım olup lâkin kethudân mûmâ-ileyhin ariyyedesinde? olan cizye malı kalyonda îrâd ve masraf olunup ve bir kîle mercimek yerine iki keyl hınta iktizâ eylediğin ve levendâta mercimek bedeli masrûf havâle olunan on bir bin iki yüz guruşdan beş bin guruşun tevzî‘i dahi mümkün olmayıp beş bin keyl mercimek beher kîlesi birer guruş İstanbul ve İzmir ve Kuşadası etrâfından tedârük olunmak mümkün olup minvâl-i meşrûh üzere deynine mahsûb olmak şartıyla kalyonlar kâtibi beş bin keyl mercimek mübâya‘a ve kusûr kalan altı bin iki yüz kîle mercimek yerine iki kat hınta mübâya‘a olunmak üzere mûmâ-ileyh kethudân i‘lâm eylemeğin imdi işbu emr-i şerîfim vardığı gibi mukaddemâ Mısır’dan havâle olunup mercimek bedeli olan on bir bin iki yüz guruşu mahâllinde ahz u kabz ve kalyonlar mesârifine îrâd kaydolunup beş bin guruşu kalyonlar kâtibi yediyle beher kîlesi birer guruş olmak üzere İstanbul ve İzmir ve Kuşadası etrâfından [185a] beş bin kîle mercimek tedârük ve kusûr kalan altı bin iki yüz kîle mercimek yerine kethudânın i‘lâmı mûcebince iki kat hınta mübâya‘a ve tedârük ve kalyonlar kâtibinin deynine mahsûb olmak üzere başmuhâsebe defterlerine kaydolunmağın mûcebince amel eylemen bâbında fermân-ı âlîşânım sâdır olmuşdur. Buyurdum ki, hükm-i şerîfimle vardıkda bu bâbda sâdır olan emrim üzere amel edip dahi sen ki müşârün-ileyhsin işbu emr-i şerîfim vardığı gibi mukaddemâ mısr-ı Kāhire’den havâle olunup mercimek bedeli olan on bir bin iki yüz guruşu mahâllinde ahz u kabz beş bin guruşu kalyonlar kâtibi yediyle beher kîlesi bir guruşa olmak üzere İstanbul ve İzmir ve Kuşadası etrâfından beş bin kîle mercimek tedârük ve kalyonlar kâtibinin deynine mahsûb olmak üzere kusûr kalan altı bin iki yüz keyl mercimek yerine iki kat hınta mübâya‘a ve tedârük etdirdip vech-i meşrûh üzere olan emr-i şerîf-i âlîşânımın mazmûn-ı münîfi ile âmil olasın, şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ ve’l-ışrîn min-Şevvali’l-mükerrem li-sene seb‘a ve mie ve elf. Be-yurd-ı sahrâ-yı Edirne.