İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 704 Hüküm no: 543 Orijinal metin no: [186a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâî taifesinin ihtiyarları marifetiyle vekil tayin edilen Ebubekir’e dışardan müdahalede bulunulmaması Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devlet ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde Sadâret-i uzmâ ve vekâlet-i kübrâ kāimmakāmı olan vezîrim Osman Paşa -edâmallâhu te‘âlâ iclâlehû- ve a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye miftâhu künûzi’l-hakāyık messâhu rumûzi’d-dekāyık el-mahfûfu bi-sınûfi avâtifi’l-meliki’l-a‘lâ Anadolu kādıaskerliği pâyesiyle İstanbul kadısı olan Mevlânâ Abdullah -edâmallâhu te‘âlâ fezailehû- tevkī‘-i refî‘-i hümâyûn vâsıl olucak ma‘lûm ola ki Ebûbekir nâm kimesne Ordu-yı hümâyûnuma arzuhâl edip mahmiye-i İstanbul’da vâki‘ sâ‘îlerin üzerine tâife-i mezbûrenin ihtiyârların ma‘rifetiyle vekîl nasb olunup yedine cânib-i şer‘den hüccet-i şer‘iye ve hâssa tahtırevâncıbaşı kıdvetü’l-emâsil ve’l-akrân Hacı Mehmed -zîde kadrühû- tarafından dahi âhardan dahl olunmaya deyü memhûr temessük verilmek mûcebince amel olunup âhardan müdâhale olunmamak bâbında hükm-i hümâyûn recâ etmeğin memhûr temessükü mûcebince amel olunmak emrim olmuşdur. Buyurdum ki, hükm-i şerîfimle vusûl buldukda bu bâbda sâdır olan emrim üzere amel ve hüccet-i şer‘iye ve memhûr temessüke nazar edip göresin arz olunduğu üzere mahmiye-i mezbûrede sâ‘îlerin üzerlerine tâife-i mezbûrenin ihtiyârları ma‘rifetiyle bunu vekîl nasbedip yedine cânib-i şer‘den hüccet-i şer‘iye ve hâssa tahtırevancıbaşı mezbûr tarafından memhûr temessük verilmiş ise temessükü mûcebince amel olunup âhardan bir ferdi bunun vekâleti umûruna dahl ü ta‘arruz etdirmeyesin min-ba‘d şer‘-i şerîf ve hüccet-i şer‘iye ve memhûr temessüküne ve emr-i hümâyûnuma muhâlif kimesneye iş etdirmeyesin şöyle bilesin, alâmet-i şerîfe i‘timâd kılasın. Tahrîren min-evâhiri Şevvali’l-mükerrem li-sene seb‘a ve mie ve elf. Be-yurd-ı sahrâ-yı Edirne.