İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 705 Hüküm no: 544 Orijinal metin no: [186b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da yangınların çok olması sebebiyle ahşap ev yapılmasına ruhsat verilmeyip taş, kireç ve çamur ile binaların yapılmasına başlanması Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devlet ve’l-ikbâl müşeyyidü erkâni’s-sa‘âdetü ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sa‘âdetimde Sadâret-i uzmâ kāimmakāmı olan vezîrim Osman Paşa -edâmallâhu te‘âlâ iclâlehû- tevkī‘-i refî‘-i hümâyûnum vâsıl olucak ma‘lûm ola ki İstanbul ve tevâbi‘inde vâki‘ büyût ve dekâkîn ve sâir ebniye müste‘id-i âfet-i harîk olan elvâh ve ahşab ve pedavra ile binâ olduğundan nâşî bi-kazâillâhi te‘âlâ def‘a be-def‘a ekseri muhterik olup ibâdullâh mutazarrır olmağla Dârü’s-saltanati’s-seniyyenin harâb olmasına bâ‘is olmağla ba‘de’l-yevm İstanbul’da müsta‘id-i harîk olan eczâ ile hâne ve dekâkîn binâ olduğuna rızâ-i hümâyûnum olmayıp Haleb ve Şam ve sâir Anadolu’da olan ebniye gibi taş ve kireç ve çamur ile binâ olunması fermânım olmağın imdi sen ki vezîr-i müşârün-ileyhsin gerek bu def‘a Galata’da muhterik olan arsalar üzerinde ve gerek İstanbul’da ba‘de’l-yevm müceddeden hâne ve dekâkîn ve sâir ebniye murâd edenlerden bir ferde elvâh ve ahşab ve pedavra ile binâya ruhsat vermeyip âfet-i harîkden mahfûz olmak için vech-i meşrûh üzere diyâr-ı Haleb ve Şam ve sâir Anadolu’da olan ebniye gibi herkes hâline göre taş ve kireç ve çamur ile binâ eyleyip ve kirpi saçak yapıp hâsılı binâ hususunda vukūf ve şu‘ûru olanlar ile söyleşip bi-hıfzıhî te‘âlâ âfet-i harîkde masûn olacak bir vech-i ma‘kūle ifrâğ eyleyip bu emirde kemâ-yenbagī tekayyüd ve tâm ve sâ‘y ve ihtimâm eylemek bâbında hatt-ı hümâyûn-ı şevket-makrûnumla fermân-ı âlîşânım sâdır olmuşdur. Buyurdum ki, hükm-i şerîfimle vusûl buldukda bu bâbda sâdır olan hatt-ı hümâyûn-ı şevket-makrûnumla vech-i meşrûh üzere şeref-yâfte-i sudûr olan fermân-ı vâcibü’l-ittibâ‘ ve lâzımü’l-imtisâlimin mazmûn-ı itâ‘at-makrûnuyla âmil olup hilâfından be-gāyet ihtirâz ve ictinâb eyleyesin, şöyle bilesin, alâmet-i şerîfe i‘timâd kılasın. Tahrîren fî evâili Zilka‘deti’ş-şerîfe li-sene seb‘a ve mie ve elf. Be-yurd-ı sahrâ-yı Edirne.