İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 711 Hüküm no: 551 Orijinal metin no: [188a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul kazasının kürekçi bedelleri ile avarız haneleri bedellerinin zamanında tahsili A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazli ve’l-yakīn hallâlü’l-müşkilâti’d-dîniye keşşâfü’l-mufassalâti’l-yakīniye vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în bi’l-fi‘il Anadolu kādıaskerliği pâyesiyle İstanbul kadısı olan ( ) -zîde fezailehû- tevkī‘-i refî‘-i hümâyûn vâsıl olucak ma‘lûm ola ki, mahmiye-i İstanbul kazâsının kürekçi bedeli ile bin yedi yüz altmış iki buçuk avârız hâneleri olup bin yüz sekiz senesine mahsûb olmak üzere avârızları cem‘ ü tahsîl olunmak lâzım gelmeğin imdi mübâşirlerin yedine verilen mühürlü ve nişânlı mevkūfât defteri sûreti mûcebince vakt ü zâmanıyla cem‘ ü tahsîl etdirilmek fermânım olmuşdur. Buyurdum ki, hükm-i şerîfimle vârid oldukda bu bâbda sâdır olan emrim üzere amel edip dahi kazâ-i mezbûrun ol mikdâr avârız hânelerinin târih-i mezbûra mahsûb olmak üzere her bir hânelerinin dörder yüz yirmi dokuzar akçe avârızları irsâl olunan mühürlü ve nişânlı mevkūfât defteri sûreti mûcebince vakt ü zamanıyla cem‘ ü tahsîl ve dâhil-i Hazîne-i âmirem etdirdip hilâf-ı emr ve defter kimesneye ta‘allül ve nizâ‘ etdirmeyesin ve bundan mâ‘adâ mübâşirin cihet-i ma‘îşeti için herbir hânelerinden onar akçe dahi aldırıp bundan ziyâde bir akçe ve bir habbe alınmaya ve aldırmayasın dahi tahsîlinden mîrî için alınan akçenin her yüz on akçesinden bir aynî esedî guruş olmak üzere alınan frengî altın iki buçuk guruş ve şerîfi ve Macar altını iki guruş ve bir rub‘ ve hâlisü’l-ayâr paranın kırk bir guruşa aldırılıp ziyâdeye ve noksana alınmaya ve aldırmayasın ger defterden ve nıkz-ı hâneden ve hilâf-ı emr ve defter te‘addîden ihtirâz eyleyesin, şöyle bilesin, alâmet-i şerîfe i‘timâd kılasın. Tahrîren fî gurrei Zilka‘de li-sene seb‘a ve mie ve elf. Be-yurd-ı sahrâ-yı Edirne.