İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 710 Hüküm no: 550 Orijinal metin no: [188a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Donanma kadırgalarına aynî kürekçi temini için hamal, Yahudi ve Rum taifelerinden kürekçi bedellerinin tahsili A‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye el-muhtassu bi-mezîd-i inâyeti’l-meliki’l-mu‘în bi’l-fi‘il Anadolu kādıaskerliği pâyesiyle İstanbul kadısı olan Mevlânâ ( ) -edâmallâhu te‘âlâ fezailehû- tevkī‘-i refî‘-i hümâyûn vâsıl olucak ma‘lûm ola ki inşâallâhu te‘âlâ deryâ yüzüne çıkacak Donanma-yı hümâyûnum kadırgaları için her sene aynî kürekçi ihrâcı mu‘tâd-ı kadîm olup mahmiye-i İstanbul hammâlâtı tâifesinden kırk nefer ve Yahûdiyân tâifesinden yüz elli nefer ve Rûmiyân-ı İstanbul’dan elli nefer ve Galata ve tevâbi‘i Rumiyânı’ndan kırk üç nefer ki Rûmiyân tâifesinden doksan üç nefer ve Ermeniyân tâifesinden yüz nefer aynî kürekçilerinin işbu bin yüz sekiz senesine mahsûb olmak üzere bedelleri tahsîl olunmak lâzım olmağla hamâlât-ı merkūm tâifesinden kırkar nefer kürekçinin <> her bir neferinden elli beş guruş esedî ve Yahûdiyân ve Rûmiyân ve Ermeniyân tâifelerinin dahi üç yüz kırk üç nefer kürekçinin her bir neferlerinden ellişer guruş esedî kâmil guruş-ı tâm bedelleri tahsîl olunagelmiş iken sâdır olan fermân-ı hümâyûnum mûcebince sa‘y cizyesiyle her bir neferinden dört buçuk esedî bedelleri Donanma-yı hümâyûnum kadırgalarının iktizâ eden kürekçi bedeliyesi için Tersâne-i âmirem emîni ( ) -zîde mecduhû- tarafına teslîm olunmak lâzım gelmeğin imdi mübâşirin yedine verilen mühürlü ve nişânlı mevkūfât defteri sûret[i] mûcebince tahsîl ve Tersâne-i âmirem emînine -zîde mecduhû- teslîm etdirilmek fermânım olmuşdur. Buyurdum ki, hükm-i şerîfimle vardıkda bu bâbda sâdır olana amel edip dahi vech-i meşrûh üzere ihrâc olunagelen aynî kürekçilerinin târih-i mezbûrda tahsîli lâzım gelen bedeliyeleri için ol mikdâr hammâlât neferâtının her bir neferinden ellişer guruş ve Yahûdiyân ve Rum ve Ermeni tâifelerinin üç yüz kırk üç neferinin herbir neferinden elli dört buçuk esedî guruş ile elli beş akçe bedelleri tahsîldâr-ı mûmâ-ileyhin yedine verilen mühürlü ve nişânlı mevkūfât defteri sûreti mûcebince vakt-i zamanıyla tahsîl ve Tersâne-i âmirem emîni -zîde mecduhû- teslîm etdirdip hilâf-ı emr ü defter kimesneye ta‘allül ve nizâ‘ etdirmeyesiz ger [eğer] defterden ve nakz-ı mal-ı mîrîden ve hilâf-ı emr ü defter te‘addîden ihtirâz eyleyesin, şöyle bilesin, alâmet-i şerîfe i‘timâd kılasın. Tahrîren fî şehr-i Zilka‘deti’ş-şerîfe li-sene seb‘a ve mie ve elf. Be-yurd-ı sahrâ-yı Edirne.