İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 721 Hüküm no: 561 Orijinal metin no: [191b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin voyvodanın elinde olan Yanaki Dimo, Paroş vesairlere ait olan paranın alınıp hazineye teslim edilmeden sahiblerine verilmesi Düstûr-ı mükerrem müşîr-i müfahham nizâmü’l-âlem müdebbiru umûri’l-cumhûr bi’l-fikri’s-sâkıb mütemmimü mehâmmü’l-enâm bi’r-re’yi’s-sâib mümehhidü bünyânü’d-devleti ve’l-ikbâl müşeyyidü erkâni’s-sa‘âdeti ve’l-iclâl el-mahfûfu bi-sınûfi avâtıfi’l-meliki’l-a‘lâ Âsitâne-i sâ‘atetimde Sadâret-i uzmâ ve vekâlet-i kübrâ kāimmakāmı olan vezîrim ( ) paşa -edâmallâhu te‘âlâ iclâlehû- ve a‘lemü’l-ulemâi’l-mütebahhirîn efdalü’l-fudalâi’l-müteverri‘în yenbû‘u’l-fazl ve’l-yakīn keşşâfü’l-müşkilâti’d-dîniye hallâlü’l-mufassalâti’l-yakīniye râfi‘ü i‘lâmi’ş-şerî‘ati ve’d-dîn vârisü ulûmü’l-enbiyâi ve’l-mürselîn el-muhtassu bi-mezîd-i inâyeti’l-meliki’l-mu‘în bi’l-fi‘il Anadolu kādıaskerliği pâyesiyle İstanbul kadısı olan Mevlânâ ( ) -edâmallâhu te‘âlâ fezailehû- tevkī‘-i refî‘-i hümâyûn vâsıl olucak ma‘lûm ola ki, Yanaki Dimo ve Paroş nâm zimmîler Ordu-yı hümâyûnuma arzuhâl edip beş-on nefer fukarânın elinde sermâyemiz olan yedi kese akçemiz için Boğdan’da bulunduğu sâbıkā Boğdan Voyvodası Kostantin Sürücü Yorgaki zimmînin olmak üzere cebrî fuzûlen elimizden ahz u kabz eyleyip İstanbul’da kendisinden da‘vâ ve taleb eylediğinde mezbûr Kostantin Bey’den mîrî için tahsîl olunmak fermân olunup lâkin henüz zimmetinde ve meblağ-ı merkūm kendi malımız olduğu ve sürücünün alâkası olmadığın müş‘ir hâl-i hayatında mektûblar verip ve malımız teslîm olunmak üzere Hasan Paşa’dan yedimize fermânlar aldırıp sahiblerine teslîm etdirile deyü tenbîh dahi olunmuş iken hilâf-ı şer‘-i şerîf ve hilâf-ı kānûn fuzûlî mîrî için tahsîline fermân verilip biz ehl-i zimmet fukarâyız, ehl-i ıyâlimize ol sermâye ile ma‘îşet kesb edip evlâd-ı ıyâlleri ve cizye ve tekâlîfimizi onunla edâ edip şimdi hâib ve hâsir kalıp zulm-i azîm olmuşdur, hâlimize merhamet olunup mesfûr Kostantin voyvodanın zimmetinde olan malımız ma‘rifet-i şer‘le alıverilmek bâbında emr-i şerîf recâ ederiz deyü bildirdikleri ecilden mesfûrların akçeleri bâ-fermân-ı âlîşân mîrî için teslîm-i hazîne olun[may]up voyvoda-i mesfûrun [Kaydın devamı 164b’ye ters olarak yazılmıştır.] [164b] hâlâ zimmetinde ise ma‘rifet-i şer‘le görülüp alıverilmek bâbında fermân-ı âlîşân sâdır olmuşdur. Buyurdum ki, sâdır olan emrim üzere amel edip dahi mesfûrların akçeleri bâ-fermân-ı âlîşân mîrî için teslîm-i hazîne olunmayıp voyvoda-i mesfûrun henüz zimmetinde ise ol takdîrce ma‘rifet-i şer‘le görüp zimmetinde zuhûr edeni alıverip ihkāk-ı hak edesin, şöyle bilesin, alâmet-i şerîfe i‘timâd kılasın. Tahrîren fî 13 şehri Zilka‘deti’ş-şerîfe sene [1]107. Be-yurd-ı sahrâ-yı Edirne. [Dış kapak içi] Müdde‘îler Mehmed b. Hasan, Şaban b. Mehmed, Süleyman b. Mehmed, Hüseyin b. Hasan . (...) olunan esâmî yevmî ikişer akçe ...? ...? Mahmud (...) her birine yediden? mâ‘adâ beşer akçe vermek üzere kavl suâl inkâr mezbûrûn yemîn.