İstanbul Mahkemesi 22 Numaralı Sicil (H. 1107-1108 / M. 1695-1697) cilt: 57, sayfa: 720 Hüküm no: 560 Orijinal metin no: [191a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sürücübaşı Yorgaki’nin Boğdan’a Paroş’un kardeşiyle gönderdiği para tahsil edilmeden hapis olan Paroş’un salıverilmemesi Kıdvetü’l-ümerâi’l-milleti’l-Mesîhiyye umdetü’l-küberâi’t-tâifeti’l-Îseviye vilâyet-i Boğdan voyvodası olan ( ) -hutimet avâkıbuhû bi’l-hayr- tevkī‘-i refî‘-i hümâyûn vâsıl olucak ma‘lûm ola ki Sürücübaşı Yorgaki bundan akdem Boğdan vilâyetine Paroş’un [191b] karındaşıyla beş bin guruş gönderip ve meblağ-ı mezbûr beş bin guruşun üç bin guruşu yine Boğdan’da mevcûd olduğu mesmû‘-ı hümâyûnum olup ve mesfûr Paroş’un karındaşı dahi hâlâ Boğdan’da mahbûs olmağla imdi işbu emr-i şerîfim vardığı gibi kat‘an avk ve te’hîr ve özr ve bahâne eylemeyip meblağ-ı mezbûru bi-eyyi hâlin tamamen merkūm Paroş’un karındaşından bi’t-tamam taleb ve ahz u kabz edip tamamen tahsîl olunmadıkça habsden ıtlâk eylemeyesin deyü fermân-ı âlîşânım sâdır olmuşdur. Buyurdum ki, hükm-i şerîfimle emekdârlardan kıdvetü’l-emâsil ve’l-akrân Hüseyin -zîde kadrühû- vardıkda bu bâbda sâdır olan emrim üzere amel edip dahi sen ki voyvodasın mezbûr sürücübaşı Yorgaki bundan akdem Boğdan vilâyetine Paroş’un karındaşıyla beş bin guruş gönderip ve meblağ-ı mezbûr beş bin guruşun üç bin guruşu yine Boğdan’da mevcûd olup ve mesfûr Paroş’un karındaşı dahi hâlâ Boğdan’da mahbûs olmağla işbu emr-i şerîfim vardığı gibi kat‘an avk ve te’hîr ve özür ve bahâne etdirmeyip meblağ-ı mezbûru bi-eyyi hâlin tamamen merkūm Paroş’un karındaşından bi’t-tamam tahsîl edip ve tamamen tahsîl olunmadıkça habsden ıtlâk eylemeyesin, şöyle bilesin, alâmet-i şerîfe i‘timâd kılasın. Tahrîren fi’l-yevmi’r-râbi‘ aşer min-şehri Şevvali’l-mükerrem li-sene sitte ve mie ve elf. Be-yurd-ı sahrâ-yı Edirne.