İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 99 Hüküm no: 34 Orijinal metin no: [12b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kumkapı-Samatya İskelesi kayıkçılarının en fazla on iki kişi taşıyacakları Ma‘rûz-ı dâ‘î-i devletleridir ki İstanbul’da Kumkapı iskelesinde olan kayıkçı tâifesinin kethüdâları Mehmed b. Abdullah ve tâife-i mezbûreden Halil b. İbrahim ve Ahmed Beşe b. Abdullah ve Samatya iskelesinde olan kayıkçılar kethüdâsı Mehmed b. Ahmed ve tâife-i mezbûreden Mustafa b. Abdullah ve Halil b. Mahmud ve Ömer b. Ahmed ve sâirleri meclis-i şer‘a gelip her biri takrîr-i kelâm edip kadîmden zikr olunan Kumkapı iskelesinden Samatya iskelesine ve Samatya’dan Kumkapı iskelesine dolmuş ta‘bîr olunur kayıklarımız ile sefer ettiğimizde, kayıklarımıza her bir seferde on ikişer adam tahmîl edegelmişler iken hâlâ kadîme mugāyir her bir seferde on beşer dahi ziyâde adam tahmîl ederler kayıkların ziyâdeye tahammülleri yokdur havf-i gark vardır deyû inhâ olunmağın, ba‘de’l-yevm zikr olunan iskelelerde her bir seferde kayıklarınıza ke’l-evvel on ikişer adam tahmîl edip bundan ziyâde tahmîl etmemeğe râzı ve müte‘ahhid olduk deyû mu‘âhedeleri tescîl-i şer‘î olunup bi’l-iltimâs huzûr-ı âlîlerine i‘lâm olundu. Fî 13 Şevvâl sene [1]138.