İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 109 Hüküm no: 45 Orijinal metin no: [15a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çörekçi fırınlarının ekmek pişiremeyecekleri Akzâ kuzâtü’l-müslimîn evlâ vülâtü’l-muvahhidîn me‘âdinü’l-fezâili ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki Gedik Paşa mahallesinde vâki‘ müteveffâ Gedik Paşa’nın evkāfından ekmekçi fırını mutasarrıfları Dîvân-ı hümâyûnuma arzuhâl edip müteveffâ-yı mûmâ-ileyh cennet-mekân merhûm ve mağfûrun-leh Sultân Mehmed Hân -tâbe serâhu-nun vüzerâsından olmağla fırın-ı mezbûr kadîm olup ve kadîmden beri nân-ı azîz tabh olunup bir vechile âhar fırına ihtiyâc yoğiken bundan akdem vâki‘ olan harîklerde fırın binâ olunca[ya dek] karşısında vâki‘ kadîmî çörekçi olan fırında nân-ı azîz tabh ve fırın binâ olundukda yine ferâgat mu‘tâd olmağın, geçen sene zuhûr eden ihrâkda fırın hedm olunup mevsim-i şitâya tesâdüfünden nâşî binâsı iki üç ay te’hîr iktizâsı ile çörekçi fırınında nân-ı azîz tabh eyleyip, ba‘dehû fırın-ı mezbûr binâ olundukda hâkim tarafından tenbîh ile ferâgat etmişiken hîle ve tezvîr ile mutlak çörekçi fırınının nân tabhına iktizâsı vardır deyû bir tarîk ile i‘lâm alıp başmuhâsebeye ekmekçi fırını olmak üzre kayd ve ekmekçi fırınının karşısında bir ekmekçi fırını dahi ihdâs edip kadîmî olan fırını battâl ve vakf-ı mezbûra gadr-ı küllî etmekle, zikr olunan fırının kaydı terkīn ve kadîmi üzre çörek-i mezbûrun tabh edip fîmâ ba‘d nân tabh etmemek üzre emr-i şerîfim verilmek recâ eyledikleri ecilden, Hazîne-i âmire’mde mahfûz olan başmuhâsebe defterlerine nazar olundukda Kosta ve Asvador nâm zimmîlerin taht-ı icârelerinde olan fırının bin yüz on sekiz senesi târihlerinde Ramazan b. el-Hâc Mehmed nâm kimesne yedinde bulunmağla nizâm kayd olunan fırınlarındandır deyû ba‘zı kimesnelerin haber verdikleri üzre yüz otuz yedi senesinde İstanbul kadısının i‘lâmı mûcebince bin yüz otuz sekiz senesi Ramazân-ı şerîfi’nde başmuhâsebeye kayd ve sûret verildiği derkenâr ve arz olundukda imdi fırın-ı mezbûr muhdes ve çörekçi iken bir san‘at ile birkaç sene mukaddem yedine bir i‘lâm alıp fermân ettirip başmuhâsebeye kayd ettirdiği bi’l-külliye hîle olduğu zâhir olmağla başmuhâsebeden kaydı terkīn ve fîmâ ba‘d ekmek işlemeyip çörek işlemek üzre tenbîh olunmak bâbında fermân-ı âlîşân sâdır olmuşdur buyurdum ki vardıkda bu bâbda sâdır olan emrim üzre amel edip dahi sen ki Mevlânâ-yı mûmâ-ileyhsin fırın-ı mezkûr muhdes olup verilen fermânın kaydı terkīn olunmakla, fîmâ ba‘d ekmek işlemeyip çörek işlemek üzre tenbîh edesiz. Şöyle bilesiz, alâmet-i şerîfe i‘timâd kılasız. Tahrîren fi’l-yevmi’l-ışrîn Şevvâl sene semân ve selâsîn ve mi’e ve elf. Be makām-ı Kostantıniyye el-mahrûse.