İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 110 Hüküm no: 46 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mahberci Mustafa’nın tacirler esnafının işlerine karışmasının yasaklandığı Mahberci fermânı Ma‘rûz-ı dâ‘î-i devletleridir ki Mahmiye-i İstanbul’da Tâcirler Kethüdâsı İsmail ve yiğitbaşıları el-Hâc Mustafa ve ustalarından diğer el-Hâc Mustafa ve Konyalı Mehmed ve el-Hâc Mehmed ve el-Hâc Abdullah ve Mustafa b. Mahmud ve sâirleri meclis-i şer‘de Tosyalı Mahberci Mustafa mahzarında bizim nizâm-ı kadîmimiz metâ‘ımız olan sahtiyânı debbâğ tâifesi taşradan mahmiye-i mezbûreye getirdikde, resm-i gümrüğü edâdan sonra doğru tâcirhânede Lonca nâm mahalle getirip kethüdâ ve yiğitbaşımız ve ihtiyâr ustalarımız ma‘rifetleriyle semen-i misilleri ile hırfet-i mezbûre erbâbına tevzî‘ ve taksîm olunagelip Tosya tüccârının alâka ve medhalleri olmamağla metâ‘ımıza karışagelmeyip hırfetimiz erbâbının gayrı metâ‘ımıza karışmakdan men‘ olunmuşiken mezbûr Mahberci Mustafa hilâf-ı fermân-ı âlî ve mugāyir-i nizâm metâ‘ımız olan sahtiyânı taşradan getiren debbâğdan hafiyyeten alıp dikici tâifesine ziyâde bahâ ile bey‘ için der mahzen ve ihtikâr etmekle nizâm-ı kadîme halel verip bizi ve dikici tâifesini ızrâr eder deyû teşekkî ve men‘ olunmasını taleb eylediklerinde mezbûr Mahberci Mustafa dahi ikrâr ve i‘tirâf etmekle, ba‘de’l-yevm nizâm-ı kadîmleri üzre hırfet-i mezbûre erbâbının metâ‘larına karışmayıp bâ‘is-i ihtilâl olmamak üzre mezbûr Mahberci Mustafa’ya tenbîh ve huzûr-ı âlîlerine bi’l-iltimâs i‘lâm olundu. Fî 18 Şevvâl sene [1]138.