İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 130 Hüküm no: 67 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kethüdâ Osman’ın Mısır’dan ham olarak gelen halatı gizlice alıp satmaması Ham âlât i‘lâmı Ma‘rûz-ı dâ‘î-i devletleridir ki Mahrûse-i Mısır cânibinden tüccâr yediyle İstanbul’a gelen hâm âlât ta‘bîr olunur peştamâl ve alaca ve sâir metâ‘ bey‘ ü şirâ eden peştamalcı tâifesinden cemm-i gafîr müslimîn ve cem‘-i kesîr zimmîler meclis-i şer‘de bâ berât-ı âlîşân kethüdâları olan Osman mahzarında kadîmü’l-eyyâmdan beri tüccâr tâifesi getirdikleri hâm âlâtı bi nefsihî esvâkda ve pazarlarda gezdirip bey‘ murâd ettiklerinde mümâna‘at olunmayıp def‘aten bey‘ murâd ettiklerinde yedimizde olan müte‘addid i‘lâm ve fermân-ı âlî mantûklarınca kethüdâ ve yiğitbaşı ve ihtiyârlar ma‘rifetleriyle bahâları kat‘ ve müslim ve ehl-i zimmet beynlerinde ale’s-seviyye tevzî‘ ve taksîm olunup bu vech üzre nizâm-ı hâlimiz var iken mezbûr kethüdâ hilâf-ı mu‘tâd-ı kadîm zikr olunan metâ‘ı hafiyyeten merkūmûn zimmîlere alıvermekle beynimizde ihtilâle bâ‘is olmuşdur deyû müslimûn-ı merkūmûndan her biri teşekkî etmeğin, fîmâ ba‘d zikr olunan hâm âlât def‘aten bey‘ murâd olundukda ber muktezâ-yı kadîm müslim ve ehl-i zimmet beyninde ale’s-seviyye tevzî‘ ve taksîm edip hilâfına tasaddî ve tecâvüz etmemek üzre mezbûr kethüdâya tenbîh olunduğu huzûr-ı âlîlerine i‘lâm olundu. Fermân men lehü’l-emr hazretlerinindir. Fî 5 Zilka‘de sene [1]138.