İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 141 Hüküm no: 80 Orijinal metin no: [23a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Oturakçılar kethüdâsı Yusuf’un terzilerin işlerine karışmaması Terzi i‘lâmı Ma‘rûz-ı dâ‘î-i devletleridir ki Ashâb-ı arzuhâl terzi tâifesinin kethüdâları es-Seyyid Ali ve yiğitbaşıları Yusuf b. Ahmed ve esnâfından İsmail b. Ahmed ve Mustafa b. Mehmed ve Hasan b. Abdullah ve Osman ve Mustafa ve Mehmed ve Feyzullah ve Süleyman nâm müslümanlar ile kefereden Artin v. Kirkor ve Ovanes v. Kasbar ve Asfader ve Agob ve Hüdâverdi nâm zimmîler meclis-i şer‘de Oturakçılar Kethüdâsı diğer Yusuf muvâcehesinde mezbûr Yusuf hırfetimiz erbâbından olmayıp bir vechile hırfetimize dahl ü ta‘arruz îcâb etmez iken Bitpazarı sûkunda civârında vâki‘ terzi fukarâsını bir tarîk ile ithâm edip her birlerimizi birer hîle ile tecrîm ve bi gayrı hakkın birer ikişer guruşumuzu ahz edip bunun emsâli ta‘cîzden hâlî olmaz deyû bi’l-muvâcehe teşekkî ve verdiklerini taleb eylediklerinden sonra ashâb-ı hukūkdan Mustafa b. Mehmed ile Artin v. Kirkor ve Ovanes ve Agob nâm zimmîlerin ba‘de’s-sübût hakları istirdâd olundukda mezbûr Yusuf’a ba‘de’l-yevm terzi tâifesinin gerek cedîd ve gerek köhne ta‘mîr edenleri her kangı mahalde sâkin olurlarsa olsunlar bi gayrı vech-i şer‘î esnâf-ı mezkûreye bir türlü müdâhale ve rencîde etmemek üzre tenbîh olunduğu huzûr-ı âlîlerine i‘lâm olundu. Bâkī fermân men lehü’l-emrindir. Fî 13 min Zilka‘de sene [1]138.