İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 154 Hüküm no: 86 Orijinal metin no: [25a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sahte ve kalitesiz çivi imal edenlerin müstakil dükkân açmaması Enserci i‘lâmı Bâ mühr-i nâib Efendi Ma‘rûz-ı dâ‘î-i devletleridir ki Enser kat‘ edici tâifesinin kethüdâları Hızır Beşe ve tâife-i mezbûreden ma‘lûmü’l-esâmî zimmîler meclis-i şer‘de yine tâife-i mezbûreden ashâb-ı arzuhâl Aksaray’da Dağlı Ali ve şerîki Vartan ve Atmeydanı’nda Danyal ve oğlu Karabet ve Sofular hamamında Haçir ve Tatos muvâcehelerinde mezbûrûn ile gāibûn ani’l-meclis Kalfa Artin ve Atmeydanı’nda Ayvad ve Kazar ve Çırçır’da Andon ve Fethiye’de Acem ve Yedikule’de Aritun ve Kali[çe]ciler köşkü’nde Dador ve Topkapısı’nda Haçador nâm zimmîler san‘atımız erbâbından olup lâkin hâm-dest olduklarından gayrı mukaddemâ ve hâlâ işledikleri enser, atîk enserden tavlanmış kalb ve alçak olup cedîd enser nâmıyla tağrîr ederek ibâdullâha bey‘ etmeleriyle ızrâr-ı âmme eyledikleri ecilden nizâmımızın ihtilâline bâ‘is olmalarıyla husûs-ı mezbûr için bundan akdem bi’d-defe‘ât kendileri tenbîh olundukda bir vechile memnû‘ ve mütenebbihler olmayıp kemâ fi’l-evvel san‘atlarında hîle üzerine ızrâr eylemişlerdir deyû teşekkî ve fîmâ ba‘d mezbûrûn zimmîler san‘at-ı mezbûreyi işledikleri takdîrce mu‘temed ustalardan birer usta yanına halîfelik ile işleyip irtikâb-ı hîleden muhâfazaları ancak bu vechile olup gayrı tarîkle imkân olmadığı ecilden mezbûrûn zimmîler ber vech-i muharrer işlettirilip müstakil dükkânda san‘at-ı mezbûreyi işlemekden men‘ buyurulmak muntazamü’l-ahvâl olmaları bâbında fermân-ı âlî recâ eyledikleri huzûr-ı âlîlerine i‘lâm olundu. Fermân men lehü’l-emrindir. Fî 12 Zilka‘de sene [1]138.