İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 153 Hüküm no: 85 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Beledî yastık ve döşek dokuyanların alaca dokumamaları Beledî yastık i‘lâmı Bâ mühr-i hazret-i Efendi. Ma‘rûz-ı dâ‘î-i devletleridir [ki] Medîne-i Tire’de beledî yastık ve döşek dokuyan beledîci tâifesinden Hasan b. Abdullah meclis-i şer‘de medîne-i mezbûrede alaca dokuyan alacacı tâifesinden el-Hâc Mehmed b. Abdullah ve İsmail b. Hasan mahzarlarında, bez dokuduğu beledî yastık ve döşeği bey‘ ü şirâsında usret çekmekle alaca dokuduğumuza mezbûrân alacacı tâifesi bî-vech mâni‘ olurlar deyû da‘vâ ettikde mezbûrân alacacı tâifesi cevâblarında, kadîmü’l-eyyâmdan ilâ hâze’l-ân medîne-i mezbûrede alaca dokuyan alacacı başka ve bedelî yastık ve döşek dokuyan beledîci başka hırfet olup her biri kendiye mahsûs olan san‘atını dokuyup âharın san‘atına karışagelmeyip nizâm-ı hâlimiz bu vech üzre muntazam iken mezbûr Hasan ve sâir beledîci tâifesi kendi san‘atlarına kanâ‘at etmeyip, bize mahsûs olan alacayı dahi dokuyup beynimizde bâ‘is-i ihtilâl olduklarından mâ‘adâ mezbûrlar üstâda hizmet ve tekmîl-i san‘at etmeyip, kethüdâ ve yiğitbaşı ve ihtiyârlar ma‘rifetleriyle başka çıkmadan bize mahsûs olan alacayı dokuyup kalb ve redî olmağla ibâdullâhı dahi ızrâr ve kānûn-ı kadîme mugāyir te‘addî etmeleriyle Dîvân-ı âlî’ye arzuhâl eylediğimizde men‘ ü def‘ olunmak bâbında yedimize işbu emr-i şerîf-i cihân-mutâ‘ dahi ihsân olunmuşdur deyû bir kıt‘a emr-i şerîf-i vâcibü’l-imtisâl ibrâz eyleyip, feth ve kırâat olundukda mazmûn-ı münîfi min külli’l-vücûh takrîr-i meşrûhlarına mutâbık bulunup ve hakīkat-i hâl bi’l-cümle alacacı tâifesinin takrîr-i meşrûhları üzre olduğunu vukūf-ı tâmları olan bezzâzlar kethüdâsı ve yiğitbaşısı ve ihtiyârlarından isimleri cerîdede mazbût on beş nefer müslimîn mezbûr Hasan muvâcehesinde ihbâr etmeğin, ber mûceb-i emr-i şerîf-i âlîşân nizâm-ı kadîme muhâlif te‘addîden mezbûr Hasan men‘ olunduğu huzûr-ı âlîlerine i‘lâm olundu. Fermân men lehü’l-emrindir. Fî 14 Zilka‘de sene [11]38.