İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 173 Hüküm no: 97 Orijinal metin no: [30a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Teknecilerin Zindankapısı mevkii dışında dükkân açamayacağı Tekneci i‘lâmı Ma‘rûz-ı dâ‘î-i devletleridir ki Mahmiye-i İstanbul’da Zindankapısı kurbunda vâki‘ tekneci esnâfının kethüdâları Mehmed b. Süleyman ile sâir ihtiyârları meclis-i şer‘de sâhib-i arzuhâl es-Seyyid İsmail muvâcehesinde bizim esnâfımız bi’l-cümle zikr olunan Zindankapısı kurbunda olup âhar mahalde kimesne koltukçuluk etmemek üzre mukaddemâ fermân-ı âlî sâdır olmağın, biz ber mûceb-i fermân-ı âlî mezbûr es-Seyyid İsmail’e Zindankapısı kurbunda bir bâb dükkân tahliyye edip gel bizim yanımızda tekne bey‘ ü şirâ eyle dediğimizde, mezbûr es-Seyyid İsmail temerrüd edip hilâf-ı fermân ve nizâmımıza mugāyir Ayazmakapısı kurbunda dükkân açıp tekne bey‘ ü şirâ ve koltukçuluk eder deyû her biri mezbûrdan teşekkī eylediklerinde ba‘de’l-yevm mezbûr es-Seyyid İsmail ber vech-i muharrer nizâmlarına mugāyir hilâf-ı fermân-ı âlî hareket etmemek üzre tenbîh olunmuşdur. Bâkī fermân men lehü’l-emrindir. Fî 19 Zilka‘de sene [1]138.