İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 172 Hüküm no: 96 Orijinal metin no: [30a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çivici olmadığından Asvador’un dükkân işletemeyeceği Enserci i‘lâmı Ma‘rûz-ı dâ‘î-i devletleridir ki Sâhib-i arzuhâl Asvador enserci tâifesinden olmak üzre tâife-i mezbûrenin kethüdâları ve sâir ustaları muvâcehelerinde iddi‘â ve kendinin müstakil dükkânda işlemesine mümâna‘at eyleme[me]lerini iltimâs eyledikde mezbûrlar dahi cevâbında, mersûm Asvador hâm-dest ve mechûlü’l-hâl olmağla mezbûrun müstakillen dükkânında işlemesi bundan akdem beynimizde verilen nizâma mugāyirdir dediklerinde fi’l-vâki‘ tâife-i mezbûrenin hâm-dest olanları bir usta yanında olup müstakil dükkânda işlememek üzre ve hırfet-i mezbûre erbâbı birbirlerine kefîl olup beynlerinde kefîlsiz kimesne olmamak üzre mukaddemâ nizâm verilip cümlesinin esâmîsi ve birbirlerine kefâletleri defter ve sicill-i mahfûza kayd olunmağın mezbûr Asvador deftere dâhil olan enser kat‘ edeceklerden değildir. Bâkī emr ü fermân sultânımındır. Fî 18 Zilka‘de sene [1]138.