İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 190 Hüküm no: 105 Orijinal metin no: [34a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul, Galata ve Eyüp’teki şişecilerin nizamı Ma‘rûz-ı dâ‘î-i devletleridir ki Mahmiye-i İstanbul’da ve tevâbi‘i Galata ve Eyyûb’da vâki‘ şişeci esnâfından Hasan usta ve Hüseyin nâm kimesneler ile Yahûd tâifesinden İlya ve Harun ve Karakaş ve Avram nâm yahudilerden herbiri meclis-i şer‘de bâ berât-ı âlîşân üzerlerine nâzırları olan es-Seyyid Ömer Ağa mahzarında cümle fırınlarımızda işlenen iki yüz otuz beş dirhem depe camı yirmi akçeye ve iki yüz yirmi beş dirhem depe camı on sekiz akçeye ve yüz seksen dirhem depe camı on altı akçeye ve yüz elli dirhem depe camı on üç akçeye ve yüz kırk dirhem depe camı on akçeye ve yüz beş dirhem depe camı sekiz akçeye ve elli dört dirhem depe camı dört akçeye ve hardal şişesi ta‘bîr [olunur] on bir dirhem şişe bir akçe ve ağzı kırık ta‘bîr olunur beş buçuk dirhem şişenin iki tânesi bir akçeye ve sâir ecnâs şişeler buna kıyâs işlenip bundan noksan olmayıp ve Yahûd tâifesinin cem‘ eyledikleri mâye ve hurda şişeleri beher yevm bir mahalle cem‘ ve nâzırımız merkūm es-Seyyid Ömer Ağa ma‘rifetiyle şişehânelere tevzî‘ ve mîrî için yaptıklarımız hamîre ve ibâdullâha füruht için işlediklerimiz depe camı ve şişeleri dahi ber vech-i meşrûh pâk ve aslah işleyip ve bundan noksan ve alçak işlerimiz bulundukda nâzır-ı merkūm ma‘rifetiyle şîkest ve hangimizin ise te’dîb ve ba‘de’l-yevm şişehâne ihdâs olmayıp ve ba‘zı hâm-dest ve nâ-ehil kimesneler şişehâne açmayıp ve şişehâne ancak vaz‘-ı kadîmi üzre yedi kârhâneye münhasır olup kat‘â ziyâde olmamak bâbında fermân-ı âlî iltimâs ettikleri huzûr-ı âlîlerine i‘lâm olundu. Fermân hazret-i veliyyü’l-emrindir. Fî 31 Zilka‘de sene [1]138.