İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 191 Hüküm no: 106 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul, Galata ve Eyüp’teki şişecilerin nizamı ve isimleri Bâ sah İşbu nizâm düstûrü’l-amel kılınıp hilâfına hareket edenleri zâbitleri te’dîb ve bundan ziyâde şişehâne ihdâs olunmaya deyû buyruldu. Defter oldur ki İstanbul ve Galata ve Eyyûb’da olan şişeci kârhânelerine mutasarrıf olan müslim ve yehûd tâifeleridir ki ber vech-i âtî zikr olunur; Ayvansaraykapısı kurbunda usta Hasan b. Sefer ve şerîkleri Levi Yahudi v. Hayim ve Harun v. Musa ve İlya v. Hayim Ve Eğrikapı kurbunda vâki‘ kârhâne ustası İlya v. Hayim Ve yine Eğrikapı kurbunda kârhâne ustası Harun Yahudi Ve Pîrî Paşa’da vâki‘ kârhâne ustası Karakaş v. Rafayel ve şerîkleri Yako v. Rafayel ve Salamon v. Avram Ve Tophâne’de vâki‘ kârhâne ustası Avrom v. Salamon ve şerîki Adadya v. Salamon Ve yine Pîrî Paşa’da vâki‘ nâzır es-Seyyid Ömer Ağa kârhânesi şerîki Neşev v. Serabil Bâlâda tahrîr olunan ustalar birbirlerine kefîl olup ve cümlesine nâzırları merkūm es-Seyyid Ömer Ağa b. Mehmed ba‘de’t-tekeffül her biri meclis-i şer‘de nâzır-ı merkūm muvâcehesinde fîmâ ba‘d cümle fırınlarımızda işlenen iki yüz otuz beş dirhem depe camı yirmi akçeye ve iki yüz yirmi beş dirhem depe camı on sekiz akçeye ve yüz seksen dirhem depe camı on altı akçeye ve yüz elli dirhem depe camı on üç akçeye ve yüz kırk dirhem depe camı on akçeye ve yüz beş dirhem depe camı sekiz akçeye ve elli dört dirhem depe camı dört akçe ve hardal şişesi ta‘bîr olunur on bir dirhem şişenin bir tânesi bir akçeye ve ağzı kırık ta‘bîr olunur beş buçuk dirhem şişenin iki tânesi bir akçeye ve sâir ecnâs şişeler dahi buna kıyâs işlenip bundan noksan olmayıp ve Yahûd tâifelerinin cem‘ eyledikleri mâye ve hurda şişeleri beher yevm bir mahalle cem‘ ve nâzırımız es-Seyyid Ömer Ağa ma‘rifetiyle şişehânelere tevzî‘ ve mîrî için yaptıklarımız hamîre ve ibâdullâha bey‘ için işlediklerimiz depe camı ve şişeleri dahi ber vech-i meşrûh pâk ve aslah işleyip ve bundan noksan ve alçak işlerimiz bulundukda nâzırımız merkūm ma‘rifetiyle şîkest ve hangimizin ise te’dîb ve ba‘de’l-yevm şişehâne ashâbı olmayıp ve ba‘zı hâm-dest ve nâ-ehil kimesneler şişehâne açmayıp ve şişehâne ancak bu yedi mahalle münhasır olup kat‘â ziyâde olmamak üzre her birimiz kavl ü karâr ve ahd ü mîsâk eyledikleri mütekarrir olmağla bu nizâm düstûrü’l-amel olmak için hükm-i hümâyûn ısdârı bâbında emr ü fermân hazret-i veliyyü’l-emrindir. Fî 22 Zilka‘de sene [1]138.