İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 193 Hüküm no: 108 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bahçekapısı İskelesi kayıkçılarının Karcıbaşı Mustafa b. Osman’la ilgili şikâyetlerinin geçerli olmadığı Ma‘rûz-ı dâ‘î-i devletleridir ki Bahçekapısı iskelesi kayıkçılarından İbrahim ve Mustafa ve Ahmed ve sâirleri meclis-i şer‘de hâlâ karcıbaşı Mustafa b. Osman mahzarında zikr olunan Bahçekapısı hâricinde cidâr-ı kal‘aya karîb Arpa Anbarı kurbunda vâki‘ mahzenin kethüdâsı mezbûr Mustafa’nın taht-ı icâresinde ve fevkānîsi bizim taht-ı icâremizde olmağla biz mürûr ve ubûr ederken zihâma bâ‘is olmağla mezbûr ihrâc olunmak murâdımızdır deyû da‘vâ edip lâkin mahall-i mezbûr iskele-i mezbûreye ba‘îd olup ve mukaddemâ karcı tâifesine verilen nizâm üzre mahzen-i mezbûrda yalnız mezbûr Mustafa kar füruht edip ve mezbûrlar hasm-ı şer‘î olmamalarıyla ber vech-i muharrer iddi‘âları bî-vech olmağın, mezbûrlar mu‘ârazadan men‘ olundukları bi’l-iltimâs huzûr-ı âlîlerine i‘lâm olundu. Bâkī fermân men lehü’l-emrindir. Fî 20 Zilka‘de sene [1]138.