İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 196 Hüküm no: 113 Orijinal metin no: [35b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Unkapanı ve diğer yerlerdeki buğday döğücülerine Yusuf Çelebi b. Abdullah’ın kethüdâ tayin edildiği Allahü hasbî Mâ fîh kemâ fîh, harrerehu’l-fakīr ileyhi sübhânehû -azze şânühû- Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da Kapan-ı dakīk kurbunda ve sâir mahallerde olan buğday döğücü hırfetinden el-Hâc Süleyman b. Abdullah ve Ömer Odabaşı b. Mustafa ve Mustafa b. Süleyman ve Hüseyin b. Abdullah ve Osman b. Abdullah ve sâirleri meclis-i şer‘-i şerîf-i enverde, hırfet-i mezbûreden işbu râfi‘ü’l-kitâb Yusuf Çelebi b. Abdullah nâm kimesne mahzarında her biri takrîr-i kelâm ve ta‘bîr ani’l-merâm edip hâlâ bizim kethüdâmız olmayıp üzerimize bir kethüdâ nasb ve ta‘yîn lâzım ve mühim olmağla mezbûr Yusuf Çelebi her vech ile kethüdâlık umûrun ikāmete kādir olup mezbûru üzerimize kethüdâ ihtiyâr eyledik hâlâ mezbûr Yusuf Çelebi savb-ı şer‘den üzerimize kethüdâ nasb ve ta‘yîn olunup vesîka ihdâ olunmak matlûbumuzdur dediklerinde mezbûr Yusuf Çelebi hizmet-i mezbûre erbâbı üzerlerine savb-ı şer‘den kethüdâ nasb ve ta‘yîn olundukda ol dahi kabûl ve hizmet-i lâzımesin edâya ta‘ahhüd etmeğin, mâ vaka‘a bi’t-taleb ketb olundu. Fî 27 Zilka‘de sene [1]138. Şuhûdü’l-hâl: Mehmed Ağa b. Mehmed, Mehmed Çelebi b. Abdullah, Sâlih Çelebi b. Süleyman, Hüseyin b. Mehmed.