İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 196 Hüküm no: 114 Orijinal metin no: [35b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Cebeci İbrahim’in gümrüğe gelen bamyaları gizlice alıp satmaması Ma‘rûz-ı dâ‘î-i devletleridir ki Sâdır olan fermân-ı âlîleri üzre mezbûrların nizâmları şer‘le görüldükde, sâhib-i arzuhâl Bostanî Kara Hüseyin hasmı Cebeci İbrahim’den ben otuz seneden beri berât-ı şerîf-i âlîşân ile bamyacıbaşı olup taşradan İstanbul’a gelen bamya doğru gümrük önüne gelip benim yedimle narh-ı cârî üzre esnâfa tevzî‘ ve taksîm olunup onlar dahi narh-ı cârî üzre ibâdullâha bey‘ edegelip hâricden kimesne hafiyyeten bey‘ ü şirâ etmek memnû‘ ve nizâm-ı hâlimiz dahi bu vech üzre muntazam iken mezbûr Cebeci İbrahim hilâf-ı nizâm taşradan gelen bamyayı hafiyyeten alıp der mahzen ve ihtikâr [ve] narh-ı cârîden ziyâde bahâ ile ibâdullâha bey‘ etmekle nizâmımıza halel ve ibâdullâhı ızrâr eylediğinden mâ‘adâ, hizmetkârım işbu Mehmed’i tenbîh için irsâl eylediğimde, mezbûru bi gayri hak darb ve şetm eyledi deyû teşekkī ve mazmûnı tahrîrine mutâbık berât-ı şerîf-i âlîşân ibrâz eyledikde ba‘de’l-yevm taşradan gelen bamyacı yediyle narh-ı cârî üzre esnâfa tevzî‘ olunup hilâf-ı nizâm müdâhale ve mu‘âraza etmemek üzre mezbûr Cebeci İbrahim’e taraf-ı şer‘den ba‘de’t-tenbîh mezbûrun ber vech-i muharrer darb ve şetmini isbâta havâle olundu isbât edince zâbiti tarafından haps olunmak iktizâ eder. Fî 23 Zilhicce sene [1]138.