İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 198 Hüküm no: 118 Orijinal metin no: [36a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Mustafa’nın Bayezid’deki dükkânında lekecilik yapmasına engel olunmaması Ma‘rûz-ı dâ‘î-i devletleridir ki Mahmiye-i İstanbul’da lekeci tâifesinden Mehmed b. Mustafa meclis-i şer‘de tâife-i mezbûreden sâhib-i arzuhâl Muslu mahzarında ben yedimde olan işbu i‘lâm mûcebince mukaddemâ müddet-i medîd üstâda hizmet edip san‘at-ı mezbûreyi bi tamâmihî öğrenip, mâhir ve üstâd-ı kâmil olduğuma üstâdım işbu hâzır bi’l-meclis Mustafa nâm kimesne bana izin verip başka çıkdıkdan sonra merhûm ve mağfiret-nişân Sultân Bayezid Hân câmi‘-i şerîfi hareminde vâki‘ mutasarrıfından işbu temessük mûcebince istîcâr eylediğim dükkânda kendiler misillü lekecilik etmek murâd eylediğimde, mezbûr Muslu bi gayri vech-i şer‘î mâni‘ olur, suâl olunup bî-vech mümâna‘at etmemek üzre mezbûr Muslu’ya tenbîh olunmak matlûbumdur deyû da‘vâ eyledikde mezbûr Muslu dahi husûs-ı mezbûru ba‘de’l-ikrâr, hakīkat-i hâl tâife-i mezbûrenin yamak oldukları câmeşûycular kethüdâsı ve yiğitbaşısı ve ustalarından tefahhus olundukda hakīkat-i hâl vech-i meşrûh üzre olduğunu her biri mezbûr Muslu muvâcehesinde ihbâr etmeleriyle, mezbûr Mehmed’in ber vech-i muharrer taht-ı icâresinde olan dükkânda kendiler misillü lekecilik etmesine bî-vech mümâna‘at etmemek üzre mezbûr Muslu’ya kıbel-i şer‘den tenbîh ve huzûr-ı âlîlerine i‘lâm olundu. El-emru men lehü’l-emr. Fî Zilhicce sene [1]138.