İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 199 Hüküm no: 119 Orijinal metin no: [36b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tulumbacı şeridini işleyenlere Ali Gerçek’in kethüdâ tayin edildiği ve sayılarının yirmi bir usta ve otuz tezgâhı aşamayacağı Bâ sah İ‘lâmı mûcebince amel olunmak deyû buyruldu. Ma‘rûz-ı dâ‘î-i devletleridir ki Sâdır olan fermân-ı âlîlerine imtisâlen tulumbacıbaşı Davud GerçekGeg meclis-i şer‘a ihzâr ve intâk olundukda zikr olunan tulumbacı şeridi demekle beyne’n-nâs meşhûr olan şeridi işleyen bizim menzilimizden mâ‘adâ gerek müslim ve gerek zimmî ve gerek Yahûd cümlesi yirmi bir nefer ve otuz destgâh olup bu mertebe usta ve destgâh berâtı dükkânı olup ziyâde olursa muhtel ve müşevveş ve kalb ve redî olmak ihtimâli olmağla bundan ziyâde olmaya ve ba‘de’l-yevm işlenen şeridi birkaç gün isti‘mâlde kalb olduğu zâhir olmamak için perdâht yâhud tokmaklamayalar destgâhdan çıktığı gibi bey‘ ü şirâ oluna ve bu güne gelince işlenip perdâhtlı yâhud tokmaklı bulunursa kethüdâ ma‘rifetiyle damgalana, ba‘de’l-yevm işlenirse mîrî için girift oluna ve hizmet-i mezbûre erbâbı üzerlerine benim oğlum olup fenn-i mezbûrda mâhir ve âlim olan işbu Ali Gerçek kethüdâ nasb ve ta‘yîn ve hırfet-i mezbûre erbâbı olan yirmi bir nefer usta ve otuz destgâh zabt u rabt için cümlesi bir handa veya bir mahalde cem‘ olundukları hâlde işlene deyû nizâm verilip ve bu nizâm ba‘de’l-yevm düstûrü’l-amel kılınmak bâbında fermân-ı âlî muhtâcdır deyû intâk ve inhâ eylediği tescîl-i şer‘î ve huzûr-ı âlîlerine i‘lâm olundu. Fermân men lehü’l-emrindir. Fî 3 Zilhicce sene [1]138.