.:: İstanbul Kadı Sicilleri ::.


Ahi Çelebi Mahkemesi 1 Numaralı Sicil (H. 1063-1064 / M. 1652-1653)
cilt: 49, sayfa: 110
Hüküm no: 108
Orijinal metin no: [17a-1]
Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.


Fâtıma bt. Musa’nın vârislerinden Yusuf ile Belkıs’ın birbirlerinin zimmetini ibra ettikleri

Mahmiye-i İstanbul’da Salih Paşa Mahallesi’nde sâkin iken bundan akdem müteveffât olan merhûm Fâtıma bt. Musa’nın verâseti zevci Yusuf b. Abdullah ile vâlidesi Belkıs bt. Abdullah nâm hatuna münhasıra olup muhallefâtının nısfı zevce ve nısf-ı âharı mezbûre vâlidesine isâbet eylediği şer‘an mu‘ayyen oldukdan sonra merhûm Yusuf mahfil-i kazâda işbu râfi‘atü’l-kitâb mezbûre Belkıs mahzarında ikrâr-ı tâm ve takrîr-i kelâm edip mûrisimiz müteveffât-ı mezbûrenin benim zimmetimde mütekarrer olan sekiz bin akçe mehr-i müeccelinin ve beynimizde ilm-i şer‘î ile ma‘lûm olan sâir muhallefâtdan bâlâda zikr olunduğu üzere bana âid olan nısf-ı şâyi‘i mezbûre Belkıs yedinden bi’t-tamam ve’l-kemâl ahz u kabz edip müteveffât-ı mezbûrenin muhallefâtına müte‘allika ve cemî‘ da‘vâ ve mutâlebeden ve eymân ve muhâsamadan mezbûre Belkıs’ın zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim, vechen mine’l-vücûh da‘vâ ve talebim ve nizâ‘ ve husûmetim kalmadı, ba‘de’l-yevm bir tarîk ile da‘vâ dahi edersem lede’l-hükkâm istimâ‘ olunmaya dedikde gıbbe’t-tasdîk mâ-vaka‘a kayd şüd.

Fi’t-târîhi’l-mezbûr.

Şuhûdü’l-hâl: Mustafa Çelebi b. Hüseyin, Ahmed Çelebi b. Hüseyin, Ahmed Kethüdâ-yı Abdullah, Hüseyin b. Hızır, Hüseyin b. Mehmed.