|
Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 109 Hüküm no: 107 Orijinal metin no: [16b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır.
Hasan Çelebi’nin babasından kalan evini annesi Gülistan’a sattığı
Mahmiye-i İstanbul’da Yavaşca Şahin Mahallesi’nde sâkin Hasan Çelebi b. Ca‘fer nâm şâbb-ı emred mahfil-i şer‘-i şerîfde vâlidesi hâfız-ı hâze’l-kitâb Gülistan bt. Abdullah nâm hatun tarafından ikrâr-ı âti’l-beyânı tasdîka vekîl olup vekâleti bi mâ-hüve nehci’s-sübût şer‘an sâbite olan Ahmed Çelebi b. Mehmed mahzarında tav‘an ikrâr u i‘tirâf edip babam müteveffâ-i mezbûrdan irs-i şer‘î ile bana intikāl edip mahalle-i mezbûrede vâki‘ bir tarafı Emir Çelebi b. Mehmed tasarrufunda olan vakıf menzile ve iki tarafı el-Hâc Receb b. Abdullah mülküne ve bir tarafı tarîk-i hâssa müntehî iki fevkānî odayı ve bir su kuyusunu ve muhavvata ve kenîfi hâvî cemî‘ mülk menzilimin nısf-ı şâyi‘ini cümle tevâbi‘ ve levâhıkıyla yüz elli kıt‘a riyâlî guruşa mukaddemâ vâlidem mezbûre Gülistan’a bey‘-i bâtt-ı sahîh-i şer‘î ile bey‘ ve teslîm ol dahi iştirâ ve kabz ve tesellüm eyleyip semen-i mezbûru yedinden ahz u kabz eyledim hâlâ dahi mülk-i mevrûsum olan nısf-ı şâyi‘-i bâkīmi yüz kırk riyâlî guruşa vâlidem mezbûre Gülistan’a bey‘-i kat‘î ile bey‘ ve teslîm ol dahi iştirâ ve tesellüm eyleyip semen-i mersûm yüz kırk riyâlî guruşu dahi yedinden istîfâ ve kabz eyleyip menzil-i merkūmun cümlesi vâlidem mezbûre Gülistan’ın mülk-i müşterâsı olup kat‘an benim medhal ve alâkam kalmamışdır, keyfe mâ teşâ’ ve hasbe-mâ türîd mutasarrıfe olsun dedikde gıbbe’t-tasdîki’ş-şer‘î mâ-vaka‘a bi’t-taleb sebt ü ketb olundu.
Tahrîren fi’l-yevmi’s-sâlis ve’l-ışrîn min-Şevvâli’l-mükerrem li-sene selâse ve sittin ve elf.
[17a] Şuhûdü’l-hâl: el-Hâc Osman, Mehmed Çelebi b. Mustafa el-Üsküdârî, Mustafa Çelebi b. Ca‘fer el-müezzin, İsa Bey b. Ahmed ve gayruhum mine’l-huzzâr.
|