İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 209 Hüküm no: 129 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dikiş ipliği ve pamuk ipliklerinin yalnızca İbrahim Paşa Sarayı’ndaki boyahanede boyanması talebi
Ma‘rûz-ı dâ‘î-i devletleridir ki Kitâbhâne-i hümâyûn vakfı için mahmiye-i İstanbul’da Atmeydanı kurbunda vâki‘ merhûm İbrahim Paşa sarayı’nda müceddeden binâ ve inşâ olunan boyahânede dikiş ipliği elvânıyla ve penbe ipliği boyayan boyacı tâifesinden ashâb-ı arzuhâl Todori v. Kalodi ve Mıgıryot v. Moskoto ve Nikola v. Tosi ve Kahrito v. Anderon ve Rado v. Kalodi ve Kostantin v. Kaloyani nâm zimmîler ve sâirleri meclis-i şer‘de takrîr-i kelâm ve ta‘bîr ani’l-merâm edip zikr olunan dikiş ipliği elvânıyla ve penbe ipliği boyamak ancak bize mahsûs olup biz dahi sâdır olan fermân-ı hümâyûn mûcebince müceddeden binâ ve inşâ olunan boyahâne-i mezkûreye nakl edip boyahâne-i mezkûreden gayrı mahallerde boyatmayıp zikr olunan dikiş ipliği elvânıyla ve penbe ipliği boyanması kârhâne-i mezkûreye mahsûs olup kârhâne-i mezbûreden hâric Üsküdar ve Galata ve Tophâne ve medîne-i hazret-i Ebâ Eyyûb el-Ensârî ve Hasköy ve sâir mahallerde olan boyacı tâifesi zikr olunan ipeklere karışmamak üzre kethüdâ ve yiğitbaşı ve cümle ihtiyâr ustalarımız ma‘rifetleriyle beynimize nizâm verilip ahvâlimiz bu vech üzre muntazam iken hâlâ kârhâne-i mezbûreden hâric zikr olunan kazâlarda vâki‘ boyacı tâifesi vech-i meşrûh üzre bize mahsûs olan ipekleri hilâf-ı nizâm mahallerinde boyayıp bize gadr ve nizâmımıza halel verirler deyû teşekkî ve zikr olunan dikiş ipliği elvânıyla ve penbe ipliği nizâm-ı mezkûrları üzre kârhâne-i mezbûrede boyatıp hâricde boyatmamak bâbında nizâm-ı hâlleriyçün yedlerine tuğrâ-yı garrâ-yı sultânî ile mücellâ hükm-i hümâyûn ihsân buyurulmak için arz u i‘lâm olunmasını iltimâs eylediler. El-emru li men lehü’l-emr. Fî 20 Zilhicce sene [1]138.
|