İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 208 Hüküm no: 128 Orijinal metin no: [39a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sebzehaneye gelen ürünlerin pazarbaşı, bölükbaşı ve esnaf ustaları tarafından dağıtılacağı Ma‘rûz-ı dâ‘î-i devletleridir ki Mahmiye-i İstanbul’da yaş yemiş pazarbaşısı vekîli Mehmed Çelebi b. el-Hâc Ahmed ve pazarcı tâifesinden es-Seyyid Osman b. el-Hâc İbrahim ve Hasan Beşe b. Abdullah ve el-Hâc Mustafa b. Mustafa ve Abbas Beşe b. el-Hâc Ahmed ve Ömer Beşe b. Osman ve Ahmed Beşe b. Mustafa ve Mehmed b. Mehmed ve Mehmed b. Mahmud ve Ahmed b. el-Hâc Ali ve Mehmed b. İsâ ve el-Hâc Mustafa b. ( ) ve Veli Beşe b. Ali ve Hasan b. Mehmed ve Veli b. Receb ve Mustafa b. Ali ve Halil b. Mehmed ve Ali Beşe b. Abdullah ve Mustafa Beşe b. Ali ve Ali b. Muslu ve Ahmed b. Mustafa ve Mehmed b. Ali ve Sâlih b. Ali ( ) b. Abdullah ve Hasan b. Ahmed ve Mustafa b. Abdullah ve Hüseyin b. Ali ve Yusuf b. Abdullah ve Halil b. Mehmed ve Osman b. Ahmed ve Ahmed b. Ali ve Hüseyin b. Hasan ve Receb b. Yusuf ve Hüseyin b. Abdullah ve Halil b. Abdurrahman ve Yusuf b. Hüseyin ve Ali b. Halil ve Ömer b. Ahmed ve Seyyid Mustafa b. Ali ve Hacı Hüseyin b. Mehmed ve Hacı Mustafa b. Yusuf ve Abdurrahman b. Ali ve Receb b. Ali ve Ahmed b. Mustafa ve Hüseyin b. Mehmed ve Halil b. Yusuf ve Ömer b. Muslu ve Mehmed b. Mustafa ve Abdullah b. Mustafa ve Hasan b. Ali ve Seyyid Mustafa b. Ali nâm kırk dokuz nefer kimesneler meclis-i şer‘de mahmiye-i mezbûrede kuru yemişçi tâifesinden el-Hâc Mustafa b. Ahmed mahzarında bizim nizâm-ı kadîmimiz taşradan Gemlik ve Katırlı ve Değirmenderesi ve Bozburun ve sâir tarafından gelen üzüm fıçı ile sefînelere tahmîl ve doğru sebzehâne önüne gelip pazarbaşı ve bölükbaşı ve esnâf-ı mezbûre ustaları ma‘rifetiyle narh-ı cârî üzre pazarcı tâifesine alenen tevzî‘ ve taksîm oluna gelip bunun hilâfına bir vechile ruhsat ve cevâz gösterilmekden ihtirâz ve ictinâb olunmak bâbında târih-i i‘lâm senesi Zilka‘desinde yedimize tuğrâ-yı garrâ-yı sultânî ile mücellâ işbu emr-i şerîf-i vâcibü’l-imtisâl ihsân olunup hilâfına kat‘â vaz‘ u hareket iktizâ etmez iken, mezbûr el-Hâc Mustafa itâ‘at-i fermân-ı âlî etmeyip hilâf-ı nizâm Gemlik’den getirdiği üzümü küfelere koyup gece ile hafiyyeten dükkâna ve mahzenine vaz‘ ve ihtikâr ve yine hafiyyeten narh-ı cârîden ziyâde bahâ ile koltukçu tâifesine bey‘ etmekle, beynimizde bâ‘is-i ihtilâl ve ibâdullâhı ızrâr ve hilâf-ı fermân hareket eder deyû teşekkî ve mazmûn-ı münîfi takrîr-i meşrûhlarına muvâfık emr-i şerîf-i vâcibü’l-imtisâl ibrâz ettiklerinde, mezbûr el-Hâc Mustafa ikrâr ve i‘tirâf etmekle, ba‘de’l-yevm nizâm-ı kadîmleri üzre İstanbul’a gelen üzümü fıçı ile doğru sebzehâne önüne getirip pazarbaşı ustaları ma‘rifetleriyle narh-ı cârî üzre esnâf-ı mezbûreye tevzî‘ edip bâ‘is-i ihtilâl olmamak üzre mezbûr el-Hâc Mustafa’ya taraf-ı şer‘den tenbîh olunup itâ‘at-ı fermân-ı âlî etmediği için ta‘zîr-i şedîde müstahık olup ta‘zîri hazret-i veliyyü’l-emrindir. Fî 25 Zilhicce sene [1]138.