İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 227 Hüküm no: 145 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aksaray çarşısındaki dellâllığı Seyyid Mehmed’den almak isteyen İbrahim’e izin verilmediği Ma‘rûz-ı dâ‘îleridir ki Ashâb-ı arzuhâl İstanbul’da Aksaray sûkunda olan oturakçılar kethüdâsı İvaz Beşe b. Abdullah ve ihtiyârlarından Hüseyin Beşe b. Ahmed ve Ali Beşe b. İbrahim ve Mustafa Beşe b. İbrahim ve el-Hâc Mustafa b. Hamza ve el-Hâc Hüseyin b. Ali ve Ali b. Hasan ve el-Hâc Ahmed b. Mehmed ve el-Hâc Yusuf b. Abdullah ve Hüseyin Beşe b. Veli ve el-Hâc Ebûbekir b. Mustafa ve Ahmed b. Mustafa ve Mustafa Beşe b. Mehmed ve Ahmed Çelebi b. Mustafa ve Uzun Ahmed b. Abdullah ve çörekçi el-Hâc Mustafa b. Abdullah ve arabacı Ömer b. Osman ve kasab Mahmud Beşe b. İshak ve uncu Mustafa b. el-Hâc Hüseyin ve sâirleri meclis-i şer‘de tâife-i mezbûreden İbrahim nâm kimesne mahzarında sûk-ı mezbûre ahâlîsinin nizâm-ı kadîmleri sûk-ı mezbûrda dellâl olan kimesne gecelerde sûk-ı mezbûrda pâzvend olup köprü başında ve Acıçeşme üzerinde ve kendi yanında cem‘an üç aded kandil îkād olunup sabâha dek sûk-ı mezbûru gezip hıfz u hırâset edegelip ve hâlâ dellâl ve pâzvend olan es-Seyyid Mehmed cümlemizin emîni ve muhtârı re’y ve ittifâkımız ile dellâl ve pâzvend olmağla mezbûrun her hâlinden râzı ve hoşnûdlar olup nizâm-ı hâlimiz dahi bu vech üzre muntazam iken işbu mezbûr İbrahim ben sûk-ı mezbûr dellâllığını dellâlların kethüdâsından aldım sûk-ı mezbûrda dellâl olurum deyû bî-vech müdâhale ve nizâmımıza halel verdiğinden mâ‘adâ mezbûr İbrahim’den emniyyetimiz dahi yokdur deyû teşekkî ve mezbûrun men‘ini iltimâs ettiklerinde, mezbûrların nizâmları vech-i meşrûh üzre olduğunu mezbûr İbrahim ikrâr ve i‘tirâf etmekle nizâm-ı kadîmlerine muhâlif sûk-ı mezbûrun dellâl ve pâzvendliğine bî-vech müdâhale etmemek üzre mezbûr İbrahim’e kıbel-i şer‘den ba‘de’t-tenbîh husûs-ı mezbûru nâtık tuğrâ-yı garrâ-yı sultânî ile muhallâ hükm-i hümâyûn recâ ve niyâz ettikleri bi’l-iltimâs huzûr-ı âlîlerine i‘lâm olundu. El-emru li men lehü’l-emr. Fî 3 Safer sene [1]139.