İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 226 Hüküm no: 144 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karılar hamamındaki boyacıların kethüdâlığına Mehmed Beşe b. Mustafa’nın tayin edildiği Allahü hasbî Mâ fîh kemâ fîh, harrerehu’l-fakīr ileyhi sübhânehû -azze şânühû- Kethüdâzâde Mehmed el-kadı bi Dâri’s-saltanati’l-aliyye -ufiye anhu- Mahmiye-i İstanbul’da Karılar hamamında sahtiyân boyayan boyacı tâifesinden perdâhtçıbaşı İsa Beşe b. Mehmed ve Mehmed Beşe b. Hasan ve el-Hâc İsmail b. el-Hâc Ali ve el-Hâc Hüseyin b. Receb ve Mustafa b. el-Hâc Hızır ve Molla Mustafa b. el-Hâc Osman ve sâirleri meclis-i şer‘-i şerîf-i enverde, hırfet-i mezbûre ustalarından işbu râfi‘ü’l-kitâb Mehmed Beşe b. Mustafa nâm kimesne mahzarında her biri takrîr-i kelâm ve ta‘bîr ani’l-merâm edip hâlâ bizim ihtiyârımız ile üzerimize kethüdâmız olan el-Hâc Mustafa bunda mevcûd olmayıp diyâr-ı âharda olmağla kethüdâlık umûru mürâ‘ât olunmayıp nizâm-ı hâlimiz muhtel ve müşevveş olmağla mezbûrun yerine savb-ı şer‘den bir kethüdâ nasb ve ta‘yîn olunmak lâzım ve mühim ve işbu mezbûr Mehmed Beşe her vechile kethüdâlık umûrunu mürâ‘ât ve ikāmete kādir ve mahall ü müstahık olmağla mezbûr Mehmed Beşe’yi üzerimize kethüdâ ihtiyâr eyledik, kıbel-i şer‘den dahi mezbûr Mehmed Beşe ber vech-i muharrer kethüdâ nasb ve ta‘yîn ve vesîka i‘tâ olunmak matlûbumuzdur dediklerinde mezbûr Mehmed Beşe hırfet-i mezbûre üzerlerine gāib-i mezbûrun yerine kethüdâ nasb ve ta‘yîn olundukda ol dahi kabûl ve hizmet-i lâzımesin edâya ta‘ahhüd etmeğin mâ hüve’l-vâki‘ bi’t-taleb ketb olundu. Fî 29 min Muharremi’l-harâm sene [1]139. Şuhûdü’l-hâl: Mehmed Çelebi b. Mehmed, Sâlih Çelebi b. Süleyman, Hüseyin b. Mehmed, Mehmed b. Abdullah.