İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 249 Hüküm no: 162 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çamaşırcıların işine müdahale etmemesi hususunda Bedros’a tembih Ma‘rûz-ı dâ‘îleridir ki Muhzır Mehmed mübâşeretiyle ihzâr-ı şer‘ olunan Bedros zimmînin hasımları olup İstanbul’da vâki‘ çamaşırcı tâifesinin kethüdâları Mustafa ve yiğitbaşıları Hüseyin ve ihtiyârlarından ma‘lûmü’l-esâmî kimesneler meclis-i şer‘de mezbûr Bedros muvâcehesinde bizim hırfetimiz erbâbı birbirlerine kefîl olup âhar kimesne bizim umûrumuza müdâhale etmemek üzre bundan akdem verilen nizâmımız üzre kıbel-i şer‘den yedimize i‘lâm verilip mûcebince fermân-ı âlî sâdır olmuşiken mezbûr Bedros hırfet-i mezbûre erbâbından olmadığından mâ‘adâ mu‘temedün-aleyh kefîli dahi yoğiken hâlâ nizâmımıza ve fermân-ı âlîye mugāyir Vâlide hanında sâkin ba‘zı kimesnelerin çamaşırlarını tathîr için alıp müdâhale ve beynimizde ihtilâle bâ‘is olur deyû mezbûrdan teşekkî ve ba‘de’l-yevm nizâm-ı kadîmimize mugāyir müdâhale etmemek üzre mezbûra tenbîh olunmak matlûbumuzdur dediklerinde mezbûre Bedros dahi ikrâr ve i‘tirâf etmeğin mûcebince ba‘de’l-yevm tâife-i mezbûre umûruna müdâhale etmemek üzre mezbûr Bedros’a tenbîh olunmuşdur. Bâkī fermân men lehü’l-emrindir. Fî 9 Safer sene [1]139.