İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 249 Hüküm no: 163 Orijinal metin no: [50b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul’a odun, kömür ve saman getiren gemilerden usulsüz vergi alınmaması Ma‘rûz-ı dâ‘îleridir ki Akdeniz ve Karadeniz cânibinden mahmiye-i İstanbul’a odun ve kömür ve saman getiren ashâb-ı arzuhâl iki yüz elli iki nefer ma‘lûmü’l-esâmî sefîne reislerinden İstanbul ihtisâbı mukāta‘ası emîni tarafından kadîmden verilegelen rüsûm-ı mîrî tefahhus olunmak bâbında sâdır olan fermân-ı âlîlerine imtisâlen mezbûrûndan rüsûm-ı mîrî tefahhus olundukda emîn-i mûmâ-ileyh yedinde düstûrü’l-amel olan fermân-ı âlî mûcebince nizâm-ı kadîmimiz kömür ve saman getiren sefâinin sekiz zirâ‘dan on zirâ‘a varınca sagīr ve on zirâ‘dan on iki ve on dört zirâ‘a varınca vasat ve on dörtden on altı ve on yedi zirâ‘a varınca kebîr i‘tibâr olunup sagīrinden on sekiz akçe resm-i mîrî ve altı akçe harc vasatından yirmi dört akçe resm ve altı akçe harc ve kebîrinden kırk sekiz akçe resm ve altı akçe harc ve bu siyâk üzre rüsûmâtımızı emîn olanlar tarafına edâ ve teslîm olunur iken birkaç nefer kimesne teferrüd ve birbirleriyle yek-dil olup kadîmden olan nizâm ve ittifâkımıza mugāyir mücerred fukarâdan celb-i mâl sevdâsıyla bâlâda mezkûr on altı ve on yedi zirâ‘a varınca kebîr sefîneden kırk sekiz akçe resm-i mîrî verile gelmiş iken bu sûretde kebîr i‘tibâr olunan sefâinleri sagīr farz ve takdîr ve vasat ve sagīr i‘tibâr olanları bi’l-külliye muzmahil eyledi hîle ve fezâhatlarını setr için kömür ve saman getiren sefâinden ale’s-seviyye yüz yirmişer akçe resm-i mîrî verilmek şartıyla gıyâbımızda hilâf-ı inhâ i‘lâm ve hüccet mûcebince emr-i âlî ısdâr ettirmeleriyle cümlemize gadr ve zulm olup ve bu makūle nizâm-ı kadîmin tağyîr ve ta‘tîline bâ‘is ve bâdî olanların birkaçı [51a] nefy-i beled olunup mâ‘adâsı firâr etmekle eyledikleri nizâm-ı kadîme mugāyir işleri mahallemize ve mîrîye muzır olmağla bundan akdem emîn-i mûmâ-ileyh yedinde düstûrü’l-amel olan fermân-ı âlîde ta‘yîn ve tasrîh olunduğu üzre kebîr ve vasat ve sagīr i‘tibâriyle resm-i mîrîyi emîn-i mûmâ-ileyhe edâ olunmak üzre bi’l-cümle râzı ve ta‘ahhüd ve ittifâk ve nizâm-ı kadîme mugāyir hilâf-ı inhâ gıyâbımızda aldıkları fermânın kaydı mahallinden terkīn olunmak bâbında fermân-ı âlî iltimâs eyledikleri huzûr-ı âlîlerine i‘lâm olundu. Bâkī fermân men lehü’l-emrindir. Hurrire fî 4 Safer sene [1]139.