İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 262 Hüküm no: 170 Orijinal metin no: [54a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Bey’in ehliyetsiz olduğu için turşucu dükkânı açmasına izin verilmediği Ma‘rûz-ı dâ‘î-i devletleridir ki Mahmiye-i İstanbul’da turşucu tâifesinin kethüdâları olan (…) ihtiyâr ustalarından İbrahim b. Hüseyin ve Mahmud b. (…) b. İbrahim ve Mustafa b. (…) meclis-i şer‘de mahmiye-i mezbûrede Küçük Karaman sûkunda sâkin İsmail b. Hüseyin mahzarında bizim nizâm-ı kadîmimiz bir kimesne ibtidâ bir ustaya şâkird olup san‘atımızı bi tamâmihî öğrenip cümle beyninde başka çıkıp üstâd-ı kâmil oldukdan sonra kethüdâ ve ustalar ma‘rifetleriyle bir münâsib mahalde kendiye bir dükkân verilip ol dahi a‘lâ turşu tabh ve narh-ı cârî üzre ibâdullâha bey‘ ede gelip bunun hilâfı hilâf-ı nizâm olduğundan mâ‘adâ mezbûr Halil kat‘â üstâda şâkird olmayıp san‘atımızdan aslâ haberi yoğiken sûk-ı mezbûrda olan kadîmî turşu dükkânına karîb bir dükkân istîcâr ve içinde turşuculuk etmek murâd etmekle nizâm-ı kadîmimize halel ve ibâdullâhı ızrâr eder hâlâ suâl olunup men‘ olunmak matlûbumuzdur, hattâ Halil Bey yüz otuz dört senesinde bir def‘a dahi Mustafa Paşa sûkunda bu misillü bir dükkân ihdâsına mübâşeret eyledikde biz dahi nizâm-ı hâlimiz vech-i meşrûh üzre olduğunu iddi‘â eylediğimizde mezbûr Halil kendi rızâsıyla ferâgat edip ba‘de’l-yevm kethüdâ ve ihtiyârların rızâları olmadıkça müceddeden dükkân ihdâsıyla nizâm-ı kadîme muhâlif vaz‘ u hareket etmemek üzre râzı ve müte‘ahhid oldukda, kıbel-i şer‘den yedimize bir kıt‘a hüccet dahi verilmişdir deyû da‘vâ ve teşekkî ve mazmûn-ı takrîrlerine mutâbık hüccet ibrâz ettiklerinde mezbûr Halil dahi ikrâr ve i‘tirâf etmeleriyle ba‘de’l-yevm mezbûrların rızâları olmadıkça müceddeden dükkân ihdâsıyla nizâm-ı kadîmlerine muhâlif vaz‘ u hareket ile beynlerinde bâ‘is-i ihtilâl olmamak üzre taraf-ı şer‘den mezbûr Halil’e tenbîh olundu. El-emru li men lehü’l-emr. Fî 13 Safer sene [1]139.