İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 263 Hüküm no: 172 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balat’taki kayıkçıların kethüdâ vekilliğine Seyyid İbrahim b. Seyyid Mustafa’nın tayini Mahmiye-i İstanbul’da bi’l-cümle kayıkçılar tâifesinin kethüdâları olan Mahmud Ağa b. Ali tarafından mahmiye-i mezbûrede Balat iskelesinde olan kayıkçı tâifesi üzerlerine kethüdâ vekîli olan es-Seyyid Ali ihmâl ve müsâmahasından nâşî iskele-i mezbûrede olan kayıkçı tâifesinin nizâm-ı kadîmleri muhtel ve müşevveş olduğundan mâ‘adâ tâife-i mezbûre narh-ı cârîlerinin iz‘âfını taleb ve ahz ile ibâdullâhı dâimâ iz‘âc ve ızrâr üzre oldukları sikāt-ı sahîhatü’l-kelimât ihbârlarıyla müte‘ayyin olmağla mezbûr es-Seyyid Ali ref‘ ve yerine tâife-i mezbûrenin muhtârları olup her vechile mahall ü müstahık olduğu ihbâr olunan işbu râfi‘ü’l-kitâb es-Seyyid İbrahim b. es-Seyyid Mustafa iskele-i mezbûrede olan kayıkçı tâifesi üzerlerine kethüdâ vekîli nasb ve ta‘yîn olundukda ol dahi kabûl ve hizmet-i lâzımesin edâya ta‘ahhüd etmeğin mâ vaka‘a bi’t-taleb ketb olundu. Fî 9 Safer sene [1]139. Şuhûdü’l-hâl: Kethüdâ Mehmed Ağa b. Mehmed, Mehmed Çelebi b. Abdullah, Sâlih b. Süleyman, Eyyûb b. Mehmed.