İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 267 Hüküm no: 179 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kethüdâ mührü bulunmayan şeritlerin alınıp satılmaması Akzâ kuzâtü’l-müslimîn evlâ vülâtü’l-muvahhidîn ma‘denü’l-fazli ve’l-yakīn râfi‘-i a‘lâmi’ş-şerî‘ati ve’d-dîn vâris-i ulûmü’l-enbiyâ’i ve’l-mürselîn el-muhtas bi mezîdi inâyeti’l-meliki’l-Mu‘în Mevlânâ İstanbul kadısı -zîdet fezâiluhû- tevkī‘-i refî‘-i hümâyûn vâsıl olıcak ma‘lûm ola ki şeridçiler kethüdâsı Ali Gerçek Dîvân-ı hümâyûnuma arzuhâl sunup, İstanbul’da tulumbacı şeridi demekle ma‘rûf beyne’n-nâs meşhûr olan kılabdanlı şerid mürûr-ı eyyâm ile kalb ve redî olmamak için şeridçi tâifesi işledikleri kılabdanlı şeridi doğru kethüdâları Ali Gerçek’e getirip, ol dahi yoklayıp pâk ve a‘lâ olanların düzleyip ve mühürleye ve pâk ve a‘lâ olmayıp kalb ve redî olan şeridleri birkaç yerinden kat‘ ve mîrî için girift oluna ve kethüdâ-yı mezbûrun mührü olmayan bey‘ ü şirâ olunmaya ve hizmet-i mezbûre mukābelesinde kethüdâ-yı mezbûrede elli dirhem şeridden ancak bir akçe alıp ziyâde bir nesne almamak üzre beynlerinde nizâm verilip bu nizâm ba‘de’l-yevm düstûrü’l-amel kılınmak bâbında emr-i âlîşânım verilmek recâsına sen ki Mevlânâ-yı mûmâ-ileyhsin i‘lâm eylemek ile imdi i‘lâmın mûcebince amel olunmak bâbında fermân-ı âlîşânım sâdır olmuşdur. Buyurdum ki hükm-i şerîfim vardıkda bu bâbda sâdır olan emrim üzre amel edip dahi husûs-ı mezbûr için vech-i meşrûh üzre verilen nizâmları ba‘de’l-yevm düstûrü’l-amel tutulup nizâm-ı mezkûra mugāyir bir ferde ta‘allül ve inâd ve muhâlefet ettirmeyesin. Şöyle bilesin, alâmet-i şerîfe i‘timâd kılasın. Tahrîren fi’l-yevmi’s-sânî ışrîn min şehri Rebî‘ilevvel li sene tis‘a ve selâsîn ve mi’e ve elf. Be makām-ı Kostantıniyye el-mahrûse.