İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 272 Hüküm no: 185 Orijinal metin no: [56b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Galata gümrüğündeki bal mumu karaborsacılarına engel olunması Ma‘rûz-ı dâ‘î-i devletleridir ki Bal mumcu esnâfının kethüdâ ve ihtiyârlarından cemm-i gafîr ve cem‘-i kesîr meclis-i şer‘de kadîmü’l-eyyâmdan beri Galata gümrüğünden gelen şem‘-i aselden cânib-i mîrî için iktizâ eden mertebesi ifrâz olundukdan sonra mâ‘adâsı esnâfımız beyninde kethüdâ ve ihtiyâr ma‘rifetiyle narh-ı cârî üzre tevzî‘ ve taksîm olunup bu vech üzre nizâm-ı hâlimiz var iken kadîme muhâlif bal mumu dellâlları peydâ ve hâlâ gelen şem‘-i aseli hafiyyeten ziyâde murâd ettikleri muhtekir tâifesine bey‘ [57a] etmeleriyle cânib-i mîrîye müzâyaka olduğundan mâ‘adâ beynimizde ihtilâfa bâ‘is olmuşdur deyû her biri teşekkî edip fîmâ ba‘d zikr olunan gümrüğe gelen şem‘-i asel cânib-i şer‘den ta‘yîn olunan yağ nâibi ma‘rifetiyle zabt u hıfz olunup mîrî için iktizâ eden şem‘-i asel ifrâz olundukdan sonra mâ‘adâsı muktezâ-yı kadîm üzre kethüdâ ve ihtiyârlar ma‘rifetiyle beynlerinden tevzî‘ ve taksîm olunup muhtekir tâifesi ve muhdes olan dellâllar def‘ u ref‘ olunmak bâbında hükm-i hümâyûn iltimâs eyledikleri huzûr-ı âlîlerine i‘lâm olundu. Fermân men lehü’l-emrindir. Fî 28 Safer sene [1]139.