İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 272 Hüküm no: 186 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kazancıbaşı Mehmed’in kazancıların mîrîye ait olanlar dışındaki işlerine karışmaması Ma‘rûz-ı dâ‘î-i devletleridir ki Kazancı tâifesinden cemm-i gafîr ma‘lûmü’l-esâmî müslimîn ve cem‘-i kesîr meclis-i şer‘de bâ berât-ı âlîşân kethüdâları olan Mehmed hâzır olduğu hâlde derûn-ı arzuhâlde mezkûrü’l-ism kazancıbaşı diğer Mehmed muvâcehesinde kadîmü’l-eyyâmdan bu âna gelince kazancıbaşı olanlar ancak mîrîye müte‘allika olan umûra müdâhale edip yiğitbaşı ta‘yîni ve şâkirdlerimizden biri başka çıkıp dükkâna geçdikde ve çıkdıkda ve sâir beynimizde olan umûrumuzu rü’yet ve ikāmet bi’l-cümle kethüdâmıza müfevvez ve vech-i meşrûh üzre beynimize nizâm verilip husûs-ı mezkûrda kazancıbaşı olanların kat‘â alâka ve medhalleri yoğiken hâlâ kazancıbaşı mezbûr diğer Mehmed nizâm-ı kadîmimizde mugāyir husûs-ı mezkûre bî-vech müdâhale ve bizi ızrâr kasdıyla kendiye cerr-i menfa‘at için herbirimizi ithâm ve tecrîm ve te‘addî ve tecâvüz ve rencîde etmekle, beynimizde ihtilâle bâ‘is olmuşdur deyû her biri teşekkî edip fi’l-hakīka tâife-i mezbûre umûruna müdâhale etmek üzre mezbûr kazancıbaşı yedinde bir sened olmamağın min ba‘d mîrîye müte‘allika olan umûrdan gayrı tâife-i mezbûre umûruna kat‘â müdâhale etmemek üzre mezbûr kazancıbaşıya tenbîh olunup mûcebince tâife-i mezbûre hükm-i hümâyûn iltimâs eyledikleri huzûr-ı âlîlerine i‘lâm olundu. Bâkī fermân men lehü’l-emrindir. Fî 25 Safer sene [1]139.