İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 278 Hüküm no: 190 Orijinal metin no: [58b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balıkpazarı Kapısı içinde bulunan Yenicami fırınına ait ekmek satış yerleri Bâ sah İstanbul kadısı fazîletlü Efendi Vukū‘u üzre i‘lâm eyleyesin deyû buyruldu. Balıkpazarı kapısı dâhilinde Câmi‘-i Cedîd fırını demekle ma‘rûf fırının kadîmî iskemlelerinin adedi ve her biri ne mahalde vaz‘ olunduğunu mahallerinde istifsâr ve haberlerini tahrîr için savb-ı şer‘den irsâl olunan ayak nâibimiz İbrahim Efendi hâlâ ekmekçiler kethüdâsı Mehmed Ağa ve yiğitbaşıları Ömer ve Salcı Ali ve ekmekçiler ustalarıyla her birinin üzerlerine varıp civârında olan bî-garaz udûl-i müslimînden istifsâr ve tefahhus eyledikde mâ tekaddemden fırın-ı mezbûr binâ olunduğu vakitde zikr olunan iskemleler cümle ittifâk ve ittihâdlarıyla zikr olunan mahallere vaz‘ olunup fırın-ı mezbûrda tab‘ olunan nân-ı azîz zikr olunan iskemlelerde bey‘ oluna gelip kat‘â kimesneye zarar-ı şer‘îsi yoğiken Çardak önünde Pirinççiler karşısında olan bir iskemle ve Çardak önünde Kolluk karşısında olan bir iskemle ki cem‘an iki iskemle hilâf-ı inhâ bir tarîk ile ref‘ olunup zikr olunan çardak önünde ibâdullâhın kesret ve vefreti olmağla ziyâde nân-ı azîze muhtâclar olup mahall-i mezkûrun birkaç iskemleye dahi tahammülü var iken bi’l-külliye hâlî kalıp, mahall-i mezbûrlarda olan ibâdullâhın ekmeğe müzâyakası olmağın, mahall-i mezbûr kimesnenin tasarrufuna dahi olmayıp bir tarafı leb-i deryâ ve iki tarafı tarîk-i mezbelelik olmağın mahall-i mezbûrun zeyli tathîr ve ke’l-evvel iki aded iskemle binâ ve nizâm-ı kadîm üzre fırın-ı mezbûrdan nân-ı azîz getirilip müstevfâ bulunmak ibâdullâha lâzım ve mühim olduğunu ihbâr ettiklerini nâib-i mezbûr mahallinde tahrîr ba‘de ümenâ-i şer‘ ile meclis-i şer‘a gelip ihbâr eyledi[kde] fırın-ı mezbûrun mutasarrıfı olan kimesne zikr olunan Çardak önünde Pirinççiler karşısında olan iskemlenin icâresi muhtesib çardağının huddâmına ve çardak-ı mezbûr önünde kolluk karşısında olan iskemlenin icâresi kolluk-ı mezbûr neferâtının me’ûnet-i zarûriyyelerine sarf için teslîm olunmak üzre kavl [ve] şart etmekle, husûs-ı mezbûru nâtık zikr olunan on dört aded iskemlelere kat‘â kimesne müdâhale ve mu‘âraza etmemek bâbında tuğrâ-yı sultânî ile muhallâ emr-i şerîf-i âlîşân ihsân buyurulmak bâbında fermân hazret-i veliyyü’l-emrindir. Fî 25 Safer sene [1]139. Yeni çarşı başında Sarrâf köşesinde iskemle 1 Balıkpazarı taşrasında iskemle 1 Balıkçılar karşısında iskemle 1 Kebîr gümrük önünde vâki‘ dükkânda iskemle 1 Balıkpazarı taşrasında Yahudiler sokağında bakkal dükkânında iskemle 1 Çardak önünde Pirinççiler karşısında leb-i deryâda vâki‘ iskemle 1 Bahçekapısı’nda 1 iskemle Tahtakale’de Pazarcı dükkânı köşesinde iskemle 1 Esirciler Hanı kurbunda iskemle 1 Saray-ı atîk kurbunda iskemle 1 Okçularbaşı’nda 1 iskemle def‘a Çardak önünde Kolluk karşısında leb-i deryâda iskemle 1 Ayazmakapısı taşrasında iskemle 1 Unkapanı kurbunda Kapan saçağı altında bayat yeri iskemlesi 1 Yekûn iskemle 14.