İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 279 Hüküm no: 191 Orijinal metin no: [58b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Balıkpazarı Kapısı içindeki yeni fırın ekmekleri satış yerlerinin tescili Devletlü sa‘âdetlü sultânım hazretleri sağ olsun Bu kulları İstanbul’da Balıkpazarı kapısı dâhilinde vâki‘ Yeni câmi‘ fırını demekle ma‘rûf kebîr ekmekçi fırınının müste’ciri olup fırın-ı mezbûr binâ olunduğu vakitlerde fırın-ı mezkûrda tabh olunan nân-ı azîz füruht olunmaklığa emr-i şerîf-i âlîşân ve hüccet-i şer‘iyyede zikr olunduğu üzre bâlâda mastûr on dört aded iskemleler mevzi‘-i mezbûrlara vaz‘ u ta‘yîn olunup lâkin mürûr-ı eyyâm ile müste’cirlerin ihmâl ve tekâsülü sebebiyle ba‘zı iskemlelerin yeri dükkân, ba‘zısı hâlî kalıp ve Çardak önünde olan iskemle yeri arsa-i sırfa ve mezbelelik ve bu vechile fırın-ı mezbûrun iskemleleri husûsu muhtel ü müşevveş olmağla merâhim-i aliyyelerinden mercûdur ki İstanbul kadısı fazîletlü Efendi hazretleri fırın-ı mezbûrun kadîmî iskemleleri olan bâlâda mastûr on dört aded iskemleleri yedimde olan emr-i şerîf-i âlîşân ve hüccet-i şer‘iyye mûceblerince kethüdâ ve yiğitbaşımız ma‘rifetiyle tahrîr ve huzûr-ı âlîlerine i‘lâm ve fîmâ ba‘d [59a] iskemle-i mezbûrlara taraf-ı âhardan bir ferde dahl ü ta‘arruz ettirilmeyip, fırın-ı mezbûr tarafından zabt ve ekmek mevzi‘-i mezkûrlarda füruht olunmak bâbında mahalline kayd ve yedime emr-i şerîf [i‘tâ] buyurulmak bâbında emr ü fermân devletlü sa‘âdetlü sultânım hazretlerinindir. Bende; fırın-ı mezbûr müste’ciri