İstanbul Mahkemesi 24 Numaralı Sicil (H. 1138-1151/M.1726-1738) cilt: 21, sayfa: 288 Hüküm no: 204 Orijinal metin no: [61b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seccade kilimi ve Bağdâdî kesme dokuyan Aleksan’ın izinsiz kurduğu fazla tezgâhların kaldırılması Ma‘rûz-ı dâ‘î-i devletleridir ki İstanbul’da vâki‘ seccâde kilimi ve Bağdâdî kesme dokuyan hırfet erbâbının kethüdâları ashâb-ı arzuhâl es-Seyyid Ali ve yiğitbaşıları Mustafa ve hırfet-i mezbûre erbâbından el-Hâc Yusuf ve es-Seyyid Ahmed ve diğer el-Hâc Yusuf ve Mustafa ve es-Seyyid Osman nâm kimesneler ile Abdo ve Tomac ve Abdülmesih ve Hindi ve Nişo ve Şamas ve Serkis ve Sekyas ve Kazar ve Filibos nâm zimmîler meclis-i şer‘de yine hırfet-i mezbûre erbâbından Aleksan nâm zimmî muvâcehesinde işbu yedimizde olan fermân-ı âlî ile mu‘anven nizâm defteri mantûkunca cümlemizin hâline göre birer ve ikişer destgâh ve mezbûr Aleksan zimmîye dahi cümle ma‘rifetiyle bir destgâh verilip bu vech üzre beynimizde nizâm verilmişiken mezbûr Aleksan cümleye muhâlif ve nizâmımıza mugāyir üç destgâh ihdâs ve cümlemizin ihtilâline bâ‘is olmuşdur deyû teşekkî ve mazmûnu takrîrlerine mutâbık fermân-ı âlî ile mu‘anven bir kıt‘a defter ibrâz etmeleriyle, fîmâ ba‘d cümleye ve nizâmlarına muhâlif ihdâs eylediği iki destgâhı ref‘ ve cümle ma‘rifetiyle yedinde olan bir destgâhdan mâ‘adâ destgâh işletmemek üzre tenbîh olunduğu huzûr-ı âlîlerine i‘lâm olundu. Fermân hazret-i veliyyü’l-emrindir. Fî 13 Rebî‘ilevvel sene 1139.